1 Aralık 2021 Çarşamba 18:15

DIA DE JURNE

Judeo-Espanyol 1138 görüntüleme
6 Ekim 2021 Çarşamba

Hayim Behmoaras

Era un diya maraviya para mi; de aya es ke me ambezi kualo es lavorar. JURNE era dia de kuzendera. Antes no aviya munchos magazenes de vistimyenta komo oy i si aviya bile eran karos. Por esto al mez una vez u en dos mezes una vez, viniya kuzendera a las kazas i era ofisyo muy bueno. Yo teniya 6-7 anyos i kuando era diya de jurne, el yugo empesava antes 2 dias, porke akel diya, eramos 6 personas kon mi. La kuzendera, para ayudar a la kuzendera viniyan Tant Fani, Tant Ester, la vizina madam Ines, yo i mi madre. Por esto, para las ropas i para las komidas antes 2 dias empesava a aparejearse, ke este en Ganeden, mi madre. Demanyana a las 8 u 8.30  prontas en muestra kaza i kon dezayuno empesava el dia, kon la konversasyon de las famiyas ke desho, ke tomo ...

I despues kada una tomava el chayiziko al lado i pasavan a sus kyoshes. La kuzendera al lado de la meza, kon un shavon empesava azer rigas i despues a kortar. Eya tomava la partida grande i a las tantis les dava pedasos para azer fofiles.

I yo en medyo era komo joker, me diziyan dame la alguja, trayme un vazo de agua, Hayimiko dame el dedal, koryendo fin a la noche, me saliya la neshama...

Tant Fanika se metiya 2 antojos uno enriva del otro, la vizina madam İnez teniya dyentes postijos i kuando beviya agua, le kayiya los dyentes aryentro la kupa! A las vezes la yamavan a mi madre para azer prova; una diziya esta kurto, la otra diziya no esta bueno, la kuzendera diziya alevanta el braso una djurdjuna era. Ya vino oras de komer, a midi se aparejava la meza, borekas, bulemas, las komidas eran muy savrozas, i empesava la konversasyon de gizar. Tomi una chali leche, Klarika kuantos guevos echas para el gomo de las borekitas, yo la berendjena antes de gizar un poko lo aspero en la agua. Loores al Dio, ya eskapo la komida i la konversasyon agora es ora de kave. La Tant Fani en kuzyendo empesa a ronkar porke despues de la komida le vino esfuenyo. Ya se izo la ora 6, eskaparon de kuzir, Klarika esta en medyo las provas. Se eskapo 2 fustas, 1 fostan i una ermozoa jaketika. 4 pedasos en un dia... 

Mi madre a las Tantis no las deshava, viniyan i los Onklis para komer a la noche. I yene empesava en la meza konversasyon, los ombres de la plasa, las mujeres del dia de jurne, i yo muerto kansado de koryer dia entero... 

Ke ermozo ke eran los dias ke pasaron..

Dias buenos kon sanedad i kon alegriya!

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR

Şalom TV Şalom Spotify'da GZ

TÜNELİN UCU - İzel Rozental

TÜNELİN UCU - İzel Rozental

MOZOTROS AİLESİ - İrvin Mandel

MOZOTROS AİLESİ - İrvin Mandel