28 Ekim 2021 Perşembe 09:02
Op Dr Mücteba Gündüz

LOS BUCHUKES

Eliz GATENYO Judeo-Espanyol 1304 görüntüleme
17 Eylül 2021 Cuma

La semana pasada meldi un artikolo en el Şalom Dergi ke me entereso muncho. El artikolo de Feride Petilon estava muy ermozo kompozado, kon fotos i roportajes kon personas enteresadas en el sujeto. El sujeto del artikolo era “İkizler” LOS BUCHUKES. Me entereso muy muncho por ke i yo tengo inyetos  buchukes. Un ijiko moreno kon ojos maron, kon una ijika blonda kon ojos blus. Uno mas savrozo de otro. Al dizir esta muy kolay. Ma no puedesh saver komo de difisil fue para mozotros de engrandeserlos.

Agora ya tienen 23 anyos. No mos kreyemos los ojos komo pasaron los anyos de verlos ke se izieron este boy.

Kuando nasyeron, dishimos mos iremos ande muestra ija a ayudarle asta ke salen los 40 diyas. Mos paresyo! Kada diya estava mas difisil del diya presedente. Primo ke la leche de la madre no estava abastando a los dos. Dishimos, una vez le daremos leche de la madre al uno i a la otra le damos biberon. Ma no reushimos por ke no se artavan de la mizma manera.  Se espertava el uno i ampesava a yorar, espertava i al otro ke estava durmiendo. Mi ija i yo kedavamos todas las dos sin durmir las noches i al diya mos kedavamos komo borrachas. Izimos un sistem ke yo iva kedar la noche espierta i iva mirar a los dos, i mi ija se iva okuparse de eyos entre el diya. Si, esto estuvo un plano maraviyozo asta ke ampesaron los bebes a durmir la noche. 

Aparte de esto, la vida de la famiya de kada diya estava kontinuando. Se keriya empleyado, gizado, alimpyado, lavados i mas, i mas.

En kurto, aviyamos dicho ke mos ivamos a kedarmos un mez o kuarenta diyas, mos kedimos un anyo i medyo! Es verdad ke disheron “bari se engrandesen en una, i despues vos repozash”, ma no es komo lo disheron. Teniyamos una vizina, un diya mos aharvo la puerta i mos disho, “este bebe hazino esta? Diya entero esta yorando.” Le dishimos: "Un poko antes era el ijiko, agora es la ijika ke esta yorando”. A la povereta de vizina le paresyo ke era un bebe solo ke estava yorando. Ansina eskapava el uno, ampesava la otra o todos los dos yoravan endjuntos. Una lokura.

Asta agora vos konti las difikultades de tener buchukes, agora vos kontare la savrozor.  Kada ijo o kada inyeto es muy ermozo, savrozo, entelijente para sus paryentes siguro, ma estas kalidades se azen dopyo kon los buchukes. No es komo tener dos kriyaturas aparte i aparte, el uno mas grande el otro mas chiko. Estavamos viendo el karakter, i las reaksyones diferentes ke teniyan todos los dos, enfrente los mizmos aktos. Komo avlavan entre eyos, komo djugavan, siguro ke se peleyavan tanbien. Para ke no tengan konkurensya, sus paryentes los metyeron en la mizma eskola ma en klasas diferentes.

Por eskapar, vos va dizir los mizmos biervos de Feride Petilon ke eskrivio a la fin de su artikolo, ke i yo esto de akordo. “Malgrado estas difikultades, kuando kero bendizir un kuple, digo “ke tengash bebes buchukes”. 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR

Şalom TV GZ

MOZOTROS AİLESİ - İrvin Mandel

MOZOTROS AİLESİ - İrvin Mandel

TÜNELİN UCU - İzel Rozental

TÜNELİN UCU - İzel Rozental