6 Mayıs 2021 Perşembe 01:29
Zen Poliklinik 1 nolu alan
Zen Poliklinik 1 nolu alan

UN TORNIKO EN LOS REKUERDOS – 2

Eliz GATENYO Judeo-Espanyol 1023 görüntüleme
17 Mart 2021 Çarşamba

La semana pasada kaminimos asta el Tünel. Agora vamos a kontinuar por la siedra del Tünel. Es la famoza abashada Yüksek Kaldırım.

En primero vemos el Karakol i al lado la Mevlevihane. Aya azen seansas de bayles relijiozos de los Mevlevis. Muy enteresante de ver. Kon sira aviyan magazenes ke vendiyan instrumentos muzikales, livros de notas, i diskos. Estos diskos viniyan de afuera del payis. Mas abasho se topavan magazenes de livros uzados. De aya se alkilava livros por una semana, kinze diyas. Despues ke se retornavan estos livros se tomavan otros. Teniyan livros en todas las linguas. I eran mas baratos. En las libreriyas akel tiempo no se topavan munchas revistas i livros en aleman. Revistas komo Bravo, Stern i livros en aleman de los famozos eskrivanos i romansos de amor. Kon mis amigas de la klasa alkilavamos livros diferentes, los meldavamos i mos pasavamos unas a otras. Ansina teniyamos de kualo meldar i diskutir.

Enfrente de estas botikas se topava un sinema ke amostrava filmos de la demanyana asta la noche. Todos los elevos ke se fuyiyan de sus eskolas se ivan aya a pasar el diya, asta la ora de eskolar i tornar a kaza komo ke si fuera ke tornan de la eskola. Aviya unos magazenes ke vendiyan fanelas, kalsas i külotes, el mas famozo era Sedef Mağazası de mösyö Kohen. Otro magazen era el vendedor de kalsas, un gurdji i sus dos ijos. Mas abasho se topava el magazen Çeşit, ke vendiya botones, ilos, astares, todo modo de menesteres de kustura. Tanbien remayava las kalsas. Kontinuamos asta la plaza de la Kula i vemos aya la famoza sharküteriya de Anastas. Vendiya todo bueno, los mas savrozos kezos, azitunas i dulses.

Kedaremos un poko en la plaza de la Kula. Esta plaza era siempre yena de manseves. Porke por aya se topavan munchas eskolas. Los renkontros eran alegres, mos estavamos en piyes oras enteras avlando i azyendo planos para la fin de semana.

Tornamos para la kaleja Büyük Hendek, aya vemos la botika de Eliya Pardo. I antes de ver el kal grande, Neve Shalom ay una kaleja ke abasha al kal de los italyanos. Lo yaman El Kal de los Frankos. En esta abashada aviya una farmasiya judiya de Kemal Akel i sus ijos. El un ijo se yamava Faruk Akel ke teniya una orkestra ande el tokava el Saksofon. Al lado aviya un atelye de marmor, debasho un kasap judyo Izak Biçaço. Un poko mas abasho aviya i ay una fuente “Laleli Çeşme” ke teniya motifes finas de tulipas. Mösyö Mordo el bakkal, Mösyö Moiz ke vendiya pan, i el zarzavatchi Bensiyon eran todos en el mizmo lugar. 

En tornando djusto a la kaleja de enfrente vemos la meshkita Okçu Musa. Al lado aviya un atelye de kalaydjis. Siempre teniyan las karas pretas de umo ke mos espantavamos de pasar por aya. Detras de la meshkita aviya el bakkal de Mösyö Israelachi.

Va meter una virgül aki i va kontinuar la semana ke viene. Porke es emposivle de eskapar de kontar estos rekuerdos.

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİLİ HABERLER

İLGİNİZİ ÇEKEBİLİR

GZ

MOZOTROS AİLESİ

MOZOTROS AİLESİ

TÜNELİN UCU

TÜNELİN UCU