Las mitzvas de Purim

Dora NİYEGO Judeo-Espanyol
24 Şubat 2021 Çarşamba

Purim es la fyesta ke mos aze akodrar la mirakuloza viktorya de los judyos bozdeyando los planos danjerozos de Aman. Esta fyesta alegre mos amostra la Mano del Dio reglando los problemes de los judyos. La mano del Dio esta allado de mozotros sin azerse apersivir.

 

La fyesta de Purim es selebrada kon la famiya entera, chikos i grandes, todos endjuntos. Por komemorar los evenementos mirakulozos, noche de Purim i al diya, meldamos la Megila de Ester. Kuando el nombre de Aman es mensyonado, batimos los pyezes embasho por arondjar el diablo.


En Purim, amostramos la emportansa de la unyon del judaizmo i de la amistad entre la famiya i los amigos, embiyando dulsurya a muestros keridos. La mas grande mitzva en Purim es de akodrarmos de los proves.


Komo en todas las fyestas, selebramos el Purim aparejando un grande pranso kon la famiya entera i los amigos por alegrarmos en este diya bendicho.

 

Azemos taanid (lo mas las ke se yaman Ester) el diya antes de Purim, ampesando tres oras antes del amaneser i kortando el taanid kuarenta puntos despues de la fin del diya.


Si el diya antes de Purim es un Shabbat, azemos taanid dos diyas antes, el diya de djugueves.
Por komemorar el medyo shekel ke kada judyo dava a los proves en el tyempo de Bet Amigdash, es uzo de dar unos kuantos groshes a los proves por ayuda. Segun esta kostumbre, esta mitzva kale ke seyga kumplida el diya de taanid.


La noche de Purim, la demanyanada i la tadre, se melda la orasyon de Al Ha Nissim, a boz basha.


En la Megila de Ester, ay una seksyon ke dize ke kale bever vino i kale emborracharse fin ke no se pueda mas entender la diferensya entre las palavras ‘Aman es maldicho’ i ‘Mordehay es santo’.


Es defendido por las mujeres de emborracharsen. Eyas kale ke aparejen el pranso de Purim i kale ke se alegren kon sus famiyas.


El pranso de Purim kale ke se apareje de diya i no de noche porke la Megila dize ‘Diya de fyesta i de alegriya’.


Purim alegre al mundo judyo i ayegados para kada anyo.

 

Siz de yorumunuzu yapın

Tüm Yorumları Görün