“LA MANSEVES” no es una perioda de la vida, ma es un estado de la alma, es el efekto de la voluntad, una kualidad de la imajinasyon, una intensidad emosyonal, una fuersa de koraje sovre la timidez, la savor de la aventura sovre el amor de la komodidad.
No mos enviejesemos por aver bivido una syerta kantita de anyos, mos enviejesemos porke deshamos muestro ideal. Los anyos arrugan el kuero, renonsiar al ideal ke tenemos, arruga muestro spiritualismo i muestro saverisyo. Las preokupasyones, los espantos i las desesperasyones son los inimigos ke a poko a poko, mos azen enklinar asta la tierra i a ser pesimistos.
Mansevo es, el ke se sorprende i se maraviya. El demanda komo una kriatura merrikioza i despues kualo va ser? El reziste a los evenementos, a las difikultades, i topa la alegria en el djugo de la vida.
Semos tan mansevos komo muestra konfiensya, komo muestra fey. Tan vyejos komo muestros dubyos. Tan mansevos komo muestra konfiensya en mozotros mizmos. Tan mansevos komo muestras esperansas. Tan vyejos komo muestro abatimyento.
Vamos a mantenermos mansevos, tanto ke vamos a kedar interesados. Interesados a lo ke es ermozo, savrozo i grande. Interesados a los mesajes de la natura, a los mesajes umanos i a los mesajes de la eternidad.
Si un dia, muestro korason sera modrido por el pessimismo, el Dyo ke tenga piadad de muestra alma i ke mos mostre la solusyon definitiva.
Kualo determina la vejes: La vejes se realiza en tres partes:
El enviejesimyento Fiziko i biolojiko,
El enviejesimyento Espiritual i
El enviejesimyento Mental. Ma, todo es organizado por el meoyo umano.
Kualo devemos de azer para kedar mansevos?
