Masterchef es un konkurso de gizados ke amostran en las televizyones de munchos payizes. I aki tanbien mos amostran este program. Verdad diziendo, ay komidas muy enteresantes i ay komidas ke no kreyo ke va pueder gostar. Muy karishik. Ma los juris o los ke dirijan este program van komiendo todo lo ke les meten delantre. Es puedeser una deformasyon de sus echos.
Masterchef no es solo un konkurso de komida, es tambien una eskola de esfuenyos de pasion i de pasensya. En el program, los konkurentes, kon materiales simples en sus manos, amostran sus kreatividad delantre del publiko, kon platos ke paresen ovras de arte. Kada plato reflekta la personalidad, el pasado i la kultura de su kreador. En vezes afita ke azen platos dezgrasyados.
Las kritikas duras del juri, en vezes meten los konkurentes en situasyones difisiles i en vezes los azen mas fuertes. Las kalderas ke buyen en la kuzina, se adjuntan kon la emosyon de los korasones de los konkurentes. En kada episodio se eskoje solo un kandidato ke se azera shampion, ma en verdad no ay perdedores porke kada uno sale kon muevas lesones i kon mas finezas kulinarias.
El mas importante mesaje de Masterchef es: Komer no es solo inchir el estomago i artar. El gizado kuando se adjunta kon amor, esforso, pena i pasensya, se torna en el espejo de una kultura i en la ekspresion de la alma de una persona.
El publiko ke mira este program se siente komo si el mizmo estuviera en la kuzina.
Este program no es solo una kompetensya de platos, es tanbien una eskola de karakter. Los konkurentes dependen de tener koraje, a kontrolar sus inyervos, a lavorar en grupo i siguro a resivir kritikas sin inyervarsen i deskorajarsen.
Kon este program mos ambezamos tanbien komidas del mundo entero. Espesias, frutas, verduras i mas otras kozas ke no tenemos visto asta agora. En vezes les dan a los konkurentes unas kozas ke no vieron asta akel tiempo i les dizen de krear una komida. Kada un konkurente apareja un plato seya salado o seya dulse. I entre eyos se eskoje el plato del diya. Muy enteresante de ver.
Si tenesh tiempo, vos konsejo de mirar, kreyo ke vos va enteresar.
