Tsav

Rav Yeuda ADONİ Köşe Yazısı
31 Mart 2020 Salı

La manera de la enkomendansa ke enkomendo el Kriyador a Aaron Akoen, sigun Rashi i munchos komentaryos, demostra de ser akavidado en el sirvisyo de la santedad. De no ser haragan, las enkemondansas i las echas buenas se deven de azer kon un grande antusyasmo. Aman ke kijo enmaleser a el puevlo djudyo en ojos de Ahashverosh, Rey de Paras le dize, egziste un puevlo entre nozotros ni a tus ordenes respektan, ni sus doveres egzekuten. Le kijo dizir, no tyenen antusyasmo por aplikar sus doveres. I Amelek vino a pelear kon el puevlo djudyo kuando estavan floshos vizavi de las misvot.

Pero, kuando se aunaron a orasyonar por sus vidas i vidas de sus ninyos, se esperto Ahashverosh dizyendo ke le melden el livro de las membrasyones. Kuando nozotros azemos nuestros doveres, kon un antusyasmo, el Kriyador de vista nos ayuda. Ek el Kriyador ni durme ni adurmese se el guadrador de Israel.

Ser akavidozo kere dizir de no deshar lo ke deve de azer oy, al diya de amanyana. Aman mando kon prisa personas, a las sivdades de el pais Paras. Hasve Shalom por atemar a el puevlo djudyo. Mordehay kon ayudo de el Kriyador trusho la salvasyon dekontino a el puevlo djudyo. Trusho alegriya, luz i gozo a el puevlo. El pasaje de Purim nos enbeza de tener la esperansa solo i solo en el Kriyador.

La santedad de Aaron poseda el puevlo si mismo a el Kriyador. En la Tora vemos munchas enkomendansas ke no es taksada su kantidad, kere dizir el Kriyador le desho a su posibilidad de la persona. Ansi ke munchos korbanot se ayegavan sigun la veluntad de el ombre. Si no ay ninguna ovligasyon porke razon fuimos enkomendados?

Rabi Yaakov Kanyaboski responde a esta demanda dizyendo: La jenerozidad ke aze el ombre por nombre de el Kriyador, malgrado ke no es enkomendado, es un servisyo ke esta azyendo a nombre de el Kriyador. I su korason se le inche kon amor de Dyos. I tyene syempre espanto de el Kriyador.

La Tora nos enkomendo de amar a el Kriyador. Komo lo meldamos en la Shema, vas a amar a tu Dyo. Es ovligado el ombre de alkansar a este sintimyento.

La jenerozidad lo trae a el ombre a estos buenos sintimyentos.

 

Siz de yorumunuzu yapın

Tüm Yorumları Görün