Diya Internasyonal del Ladino

Silvyo OVADYA Köşe Yazısı
12 Şubat 2020 Çarşamba

Diya de Alhad pasado aviyamos organizado una seansa de sinema en el museo. Era el filmo de Rachel Amado “Arvoles yoran por luvya” ande esta kontando su vida i lo ke bivyo en las Amerikas kuando se fue anyos antes. Eya es una de las primeras mansevas/mujeres ke toparon el koraje de ir a la Amerika. Reelmente mizmo si era un filmo realizado trenta anyos antes, kero dizir ke es un dokumentaryo emportante para los Sefardim mizmo para los Djudios. Despues del filmo tuve la posibilidad de dar syertas eksplikasyones a los ke partisiparon, en partikular a los ke no eran Djudios.

Despues teníamos una reunyon en la eskola djudia ande nuestros amigos estavan lavorando para el Diya Internasyonal del Ladino. La primera prova era la de Anna Eskenazi, Şeli Gaon i Süzet Herman. Están aparejando una parodia komo kada anyo. I kreo ke van a tener un grande sukseso.
Después İzzet Bana íon las Estreyikas d’Estanbol lavoraron diya entero para selebrar sus 15 anos de egzistensya. Ke no vos pareska ke son los mismos. Kon la pasensya de İzzet a lo manko sesh o siete vezes troko la ekipa de Las Estreyikas. I kada vez empesando de alef. Realmente devemos de felisitar İzzet. Devemos de felisitarlo porke ambezo a lo manko a sien kreaturas de kantar en Djudesmo.

Esto achetando ke es por la primera vez ke reushimos a vender mas de dosyentas envitasyones dyes diyas antes. I kreo ke vamos a tener mas de kuatroshentos envitados en este diya. Ay muchas razones para tener este sukseso. Savemos ke Forti Barokas kon Ferit Kohen están lavorando kon una ancha ekipa para realisar un musical en Djudesmo. I diya de alhad no entendí lo ke estava pasando. Kada punto una otra persona. Kreo ke son mas de 20 o vente i sinko personas en la shena. I ay un ekipo ke esta ayudando los ke están en la shena.

Ay munchos ke mos dyeron apoyo para ke realizemos este dia. Este anyo avrimos la bolsa! Forti me disho “dame paras para merkar syertas vestimyentas del kermes de la Fakirleri Koruma” i le dishe toma estas paras. Me demandaron todo lo ke kaliya para el konsyerto i les dishe esto pronto a dar lo ke es de menester. I este modo gastimos bastantes paras para este diya. Kreo ke va ser un diya reushido.

Por muestro Sentro ke esta aparejando un muevo sitio de web, este diya tiene una grande emportansa. Ya se ke olvidamos de invitar syertas personas. Ma no es fasil de organisar un diya tan komplikado kon poka djente. Esto achetando ke todos los miembros de muestra asosyasyon mos están ayudando. Ma keremos un apoyo puede ser mas profesional.

Alhad vash a komer un pranso sefaradi i kasher organisado por Meir Baruh de Robelyu. Ay tres anyos ke mos esta aparejando una komida muy buena.

Tenemos otras surprizes. Puedesh ver estas surprizes si venish a i partisipash a este diya.

 

 

 

Siz de yorumunuzu yapın

Tüm Yorumları Görün