El punto el mas emportante en la ley Djudia es ke no ay diferensias entre los Djudios. No ay sektas ande se keren matar. Kreo ke la sola diferensya son los Karaim ke no achetan el Talmud ni los Hahamim. Kreen solo en la Tora. Malgrado ke no ay una ley diferente, vemos diferensias entre los uzos i kostumbres. I de vez en kuando diferensias entre el modo de penserio. En Estanbol oy en diya ay solo el Gran Rabino Sefaradi, el Rav İzak Haleva. Ya savemos ke anyos antes el Rav Marcus era el Gran Rabino Ashkenazi ma no el Hahambashi. Unas kuantas semanas antes, egzaminando kon un sinyor ke se entyende muy bien, mizmo ke es el maestro del solietreo en el mundo Sefaradi, avia en los livros del Beth-Din un karar ande el Beth-Din (Siguro Sefaradi) estava dando el derecho a un ombre kazado de tomar una segunda mujer - a lo ke entendi, la primera tenia una makula - kon una kondisyon; si un diya la mujer kere su get el granrabinato - el Beth Din - se lo va dar sin tomar el avizo de su marido.
Malorozamente muy poka djente asistyeron a esta orasyon. Vemos ke esta Sinagoga es la sola i la unika ande las orasyones se egzekuten en el rito Ashkenazi. Mizmo el Rav Mendi Chitrik kuando pensa ke no ay dingunos en la Sinagoga Ashkenazi vyene a la Keila de Şişli para la Orasyon de Shabat. Ma ay un ekip kompleto de hazanim ke sestan kada Shabat aya por la orasyon. Mizmo los otros diyas de la semana.
Ya savesh ke la Akama se aze despues ke se meldo la partida de la Tora en los Ashkenazis i no antes de empesar la Perasha komo se aze en los Sefaradis. I kreo ke una de las diferensyas es ke no se achetan los Koenes komo los Koanim del tyempo del Beth Amigdash. I komo los Sefaradis; los Ashkenazis no azen el mizmo modo de orasyon para los Koanimes. Malgrado estas chikas diferensyas no vemos diferensyas entre los Sefardim i los Ashkenazim. Es por esto ke estan aparejando una nochada en el Templo de Neve Shalom el 23 desembre “Burstein’s Klezmer Basement & Cenk Rofe”. Kreo ke esta aktivitad va ser apresiada por los miembros de la Komunidad Djudia d’Estanbol.
Ya savesh ke asendimos por la primera vez afura de los tejados, las kandelas de Hanukiya en la plasa de Ortaköy, mizmo la segunda en el mizmo lugar; el anyo pasado las kandelas de Hanukiya fueron asendidas en Nişantaş en un parko. Este anyo muestros diridjentes dyeron karar de asender las kandelas en la Kula. Noche de Alhad despues del Arvit en el Neve Şalom, la djente va tener la posibilidad de vijitar el Museo Djudio sin dar paras, antes ke asendamos las kandelas de la Hanukiya. Despues todos endjuntos vamos a ir a la Kula ande vamos asender las kandelas. Estamos empesando un muevo projekto sovre la Kula; i espero ke vamos a tener fotrografias fantastikas en este lugar asendyendo las kandelas.
