Keridos lektores, ay anyos ke ay mankas personas en las islas (Büyükada/Prinkipo i Burgaz). Ya se ke vash a dizir ke ay munchas personas ke no moran mas en Turkiya i ke biven en otros payizes. Es djusto. Ma no savesh ke ay munchas personas de muestra komunidad ke biven diyas de enverano en Bodrum o en Çeşme. No se si los dirijantes de muestra komunidad saven egzaktamente kualo es el shifro de esta populasyon. Es djusto ke tenemos un midrash en Çeşme en el Otel Şeraton ande los patrones son los Izmirlis. Kuando yo era prezidente de muestra komunidad, vyendo ke ay una grande kolektividad en Bodrum organizimos en Rosh Ashana i en Kipur orasyones en un otel embiyando dos hazanes aya. Ma kreo ke no fue muy reushido. Porke no kontinuimos esto.
Dia de djueves, kon mi mujer mos fuimos a Bodrum para una boda ke se realizo en el restoran de un otel, noche de alhad (shabat la noche). El novio era muestro vizino de la Büyükada. El se topa en Frankfurt i lavora en los echos de publisidad (reklam). Kuando estavamos en la boda vimos un alay de djente ke konosemos i la mas grande partida moran en el mizmo lugar (site) ke los paryentes del novyo. Reelmente estava muy enteresante. Mi mujer topo una amiga ke estudyeron endjuntos en la eskola segundarya i ke no la vido los kuarenta anyos dalkavo. Eya mora en Nice kon su marido i kon sus ijos, ma tyene una kaza en Bodrum ande pasa el enverano. Si vos parese ke es solo eya? No, ay un alay de djente ke biven en las sivdades de Evropa o de las Amerikas i ke vienen en enverano para pasar las vakansas. Esto kere dizir ke de una vanda ay personas ke son orijinaryos de Turkiya i ke biven en otros paizes, i ay orijinaryos de Turkia ke biven en otros paizes i ke vyenen a pasar el enverano en un kazal de muestro payis. I reelmente el nombre de esta djente no es muy neglijante (ihmal edilebilir).
Kale achetar ke Bodrum kon sus diferentes lugares es un kazal – ke no se izo dainda sivdad, i ke es mas grande de munchas sivdades de muestro payis - reelmente muy natural - si le kedo mas - i muy turistiko. Despues de tantos turistos arabos ke vijitan Estanbol es la primera vez ke vide en Turkiya turistos Evropeos i solo Evropeos. Kreo ke los turistos de los payizes Arabos no se interesan en Bodrum. Bendicho el Dyo. I este modo, este kazal tuvo la posibilidad de estar mas serka del oksidente (batı).
La boda se realizo en uno de los mas renomados oteles i reelmente fue una nochada muy reushida. Todos baylaron oras enteras. Oguro una vida oroza a los muevos kazados.
