Ekev

Rav Yeuda ADONİ Köşe Yazısı
21 Ağustos 2019 Çarşamba

I no te afriyo, i no te izo tener ambre, i te izo komer man (magna) para azerte saver no bive de pan solo, o sino ke de toda palavra ke sale de la boka de el Kriyador bive el ombre. Estos versetos meldamos en la perasha ke meldamos esta semana. El kamino derecho de tener espanto del Dyo es de tener viguzya (esperansa) en el Kriyador sin ninguna ezitasyon. Le persona ke no pense ke kon su pena i lavoro alkansa a la prosperidad sino ke es kon el ayudo del Dyo. En el Midrash konta: Yermiyau, el profeta demanda a el puevlo djudyo deke no vos okupash kon el estudyo de la ley? Le repondyeron a el profeta Yermiyau  dizyendo: Si nos entretenemos en el estudyo dela Tora komo nos vamos a mantener? Estonses les akodro a eyos la magna ke komyeron nuestros padres en el dizyerto kuarenta anyos, dizyendo, vuestros padres estudyaron la Tora i el Kriyador los mantuvo a eyos. I vozotros si tenesh la kreyensa no neglijesh el estudyo de la ley. El Kriyador tyene munchos mesajeros ke apareja el mantenimyento de sus keridos. El Kriyador kudya a los ke son atados a el djudaizmo, a la ley, a los ke esperan sus mersedes. La magna ke komyeron nuestros padres en el dizyerto era un milagro de los syelos. La figuzya (Avtaha) es de tener la esperansa en el Kriyador. El Kriyador es la solombra de la persona komo meldamos en el livro de Teilim Ad… Tsileha. La figuzya (Avtaha) la puedemos entender kon un egzempyo:

Una persona ke espera de su konpanyero, i su konpanyero ya lo save muy bueno ke el mantenimyento de sus konpanyeros esta dekolgado en el. Kon grande kudyo mira de no azerle mankar ninguna koza a su konpanyero.

No kere dicho ke el Sinyor del mundo ke es fuerte de los Fuertes piadozo i grasyozo. El es ke apiada de la kriyansa dizde ke esta en la tripa de su madre. El poder esta solo en el. El konose i save la mankura de kada uno i uno. I la persona es ovligada de esperar solo de el Kriyador. La persona no deve de yerrarse dizyendo: Kon mi fuersa i saviduriya alkansi la prosperidad. David Ameleh en uno de sus salmos dize: ABOTEAH B.A… HESED YESOVENENU. El ke se enfiguzya en el Kriyador, mersedes buendades lo arodean. No egziste otro kamino, si no de esperar en el Kriyador. Solo el Kriyador kumple los dezeos i las mankuras de la persona. I el poder esta solo i solo en la mano del Kriyador. Es un dover sakro, por kada persona i persona de perkurar a alkansar a la avtaha (figuzya) ke es simyento de la Tora entera.

Si esperamos nuestro avenir de el Kriyador estonses alkansamos a el Ayudo del Dyo. Komo esta dicho: Bendicho es akel ombre ke se enfiguzya en el Kriyador, i el Kriyador es su figuzya. Este verseto ke meldamos en la Birkat amazon, beraha de despues de komer, kere dizir, si la persona entrega su alma, de esperar su egzistensya en el Kriyador, es muy siguro ke el Kriyador va estar en su ayudo.

 

Siz de yorumunuzu yapın

Tüm Yorumları Görün