Sovre ka semana pasada

Silvyo OVADYA Köşe Yazısı
26 Haziran 2019 Çarşamba

La semana pasada tuvimos dos evenimyentos muy importantes. El primer era las eleksyones munisipales d’Estanbol. Para mi el sigundo evenimyento emportante era la muerte del sinyor Isak Pinhas ke fue una persona ke ayudo a munchas ovras i dyo apoyo a munchas personas ke tuvyeron de menester de su ayudo.

Para empesar devo de avlar sovre la eleksyon ke se realizo diya de alhad. Deviamos de irmos a una fierra emportante a la Espanya. Ma pormo de las eleksyones trokimos muestros bilyetos de avion i mos fuimos despues ke votimos. El Turkish Airlines avia deklarado ke no iva tomar paras para trokar los bilyetos ma pagimos para kada bilyeto sheshentas liras de diferensya i kuando demandimos atras mos embiyaron una letra dizyendo ke van a mirar despues ke tornimos atras. Deke?

Deke esta eleksyon era tan emportante? Porke tres mezes antes despues ke el partido de la opozisyon gano kon el apoyo de los otros partidos de la opozisyon i despues ke lo deklararon komo mayor de la sivdad, dyeron karar de azer las eleksyones una segunda vez. I una grande  partida del puevlo estavan muy furyozos kontra esta desizyon. La diferensya entre los dos kandidatos era serka de tredje o katorze mil votos. I despues de 83 diyas esta vez el kandidato de la oposisyon gano kon mas de 800 mil votos de diferensya. Vemos ke los mansevos tyenen mas munchas posibilidades para realisar kozas muevas. I vemos ke el puevlo ke kere la demokrasiya esta kontra las indjustisyas. Reelmente la anulasyon de las eleksyones no tenia argumentos bastante djustos.

Esperamos ke este rezultado va enforteser la demokrasiya en muestro payis.

Es dyes diyas antes ke me ambezi la muerte del respektavle sinyor İsak Pinhas ke mos desho la buena vida despues ke paso buen karar de tyempo en la kama en su kaza i en el ospital. Kreo ke era tredje-katorze anyos antes ke un amigo ke era el prezidente de una ovra me disho ke el Sinyor Pinhas kon su mujer Fortune ke vyenen a Estanbol de vez en kuando keren ayudar a syertas ovras. I es de este tyempo ke tuve relasyones kon los Pinhas.

İsak Pinhas era un ombre ke saviya lo ke keria. Kon su kara riente djuzgava lo ke se devia de azer. Kuando no estavamos de la mizma idea deviamos de dar karar despues de una diskusyon bastante larga. Mizmo si achetava mi idea devia de djuzgar despues si era djusta o no. I si no era konvensido me telefonava para dizirme ke no pensa koma mi. Malorozamente no tuve la posibilidad de verlo estos tres anyos dalkavo. Telefoni de vez en kuando a la sinyora Fortune para demandar un hatir. Agora esto kontente. Porke en el tino tengo su fizyonomiya kon su kara riente. I no su dalkavo fizyonomiya.

El Sinyor Pinhas ke era una persona muy onesto tenia una partida de su poder en las bankas turkas ma pagava el dasyo de su ganansya en Turkiya i en Israel. El teniya una “mandra” ande azia uno de los mijores kezos blanko ke se vende en Israel. I reelmente izo este echo anyos i anyos. Sinyor Pinhas pedrio su padre kuando teniya 5-6 anyos. I empeso a lavorar kon su papu kuando era chikitiko. Mizmo tuvo el koraje de ir solo a Estanbol para merkar syertas kozas.

Mos vamos akodrar del sinyor Pinhas kuando vamos a estar kon su mujer Fortune. Mizmo kuando vamos a ser unas kuantas personas ke lo konosen para avlar de su jenerosidad.

Ke su alma repoze en Gan Eden.

 

Siz de yorumunuzu yapın

Tüm Yorumları Görün