Anyos antes un amigo me estava avlando de Seattle, Washington. I reelmente era por la primera vez ke oyi ke ay dos Washington en los Estados Unidos. La primera es la kapitala de los Estados Unidos i el segundo es el estado ande se topa la sivdad de Seattle. Sivdad ande ay una komunidad djudia importante. Importante porke fue fundada por los Djudios turkanos. Djudios ke vinieron de la Isla de Marmara, de Rodosto (Tekirdağ), de la Isla de Rhodes i mizmo de las sivdaded de Trakya komo Kırkkilisa (Kırklareli) i Dardanel (Çanakkale). No me mensionaron la sivdad de Çanakkale ma si ay las famiyas Varon, Ruso deve de ser ke vinyeron de aya...
Esto en esta sivdad porke estava envitado por el Ministeryo de los echos Etranjeros de Espanya i su organizasyon Centro Sefarad-Israel, ke organiza una reunyon kada dos anyos en un payis i sivdad diferente ande dan importansa a la kultura Sefaradi i a la lingua Judeo-Espanyola. Este anyo organizaron esta aktividad en Seattle. Ya se ke la komunidad djudia Sefaradi da muncha importansa a esta kultura. En la Universidad de Washington, tyenen mizmo un departamento ke lavora sovre este sujeto. El hazan Izak Azous (Azuz ke savemos) ke nasyo en el anyo 1930 aki en Seattle i ke fue hazan 35 anyos entre los anyos 1966 i 2002 mos dyo una konferensya sovre los Djudios de Seattle. Vimos un alay de fotos de los turkanos ke vinieron a esta sivdad. Despues de la konferensia avli kon el hazan Azous i le dishe ke puedemos azer una ekspozisyon entitulada “De la Isla de Marmara i de Rodosto a Seattle”. Ekspozisyon ande vamos a topar serka de 80 fotos kon los balukchis i proprietaryos de restoranes turkos. Oy en diya malorozamente kedan serka de 1000 sefardim en Seattle. I la populasyon Djudia no es mas ke 4-5000 almas. Vijitimos mizmo el Simeteryo Sefaradi ande todos los nombres de famiya eran konosidos. De Chiprut a Moshkatel, de Azuz a Behar, mizmo de Varon a Uziel...
El mizmo diya tuvimos la oportunidad de vijitar el Sentro del Olokosto. Vimos aya un filmo ande 6 personas ke se salvaron del kampo de Auschwitz-Birkenau i ke dyeron sus testimonyos a este Sentro. Una mujer ke kreo ke es la responsavle del muzeo mos giyo i mos amostro una foto travada en el empesijo de la gerra kon 40 ijikas i ijikos i la foto estava kortada. Eta, su madre, la sola ke sovrebivyo el olokosto entre estas 40 kriyaturas, korto la parte ande se topava porke era la sola foto ke pudo topar en su kazal. Es un sentro muy chiko ma esta mujer mos konto estas fotos en una ora. I reelmente yorimos kuando estava kontando. Es muy enteresante porke ay un nombre muy alto de sovrebivientes del Olokosto en Seattle. Para eskapar mi echo, le di mi karta i tomi la suya. Reelmente es una persona muy importante para ensenyar a los mansevos el Olokosto. I es su dover.
La semana ke vyene kreo ke el Şalom no se va publikar. Vamos a estar endjuntos en dos semanas.
