Una mueva aktividad en Andirne

Silvyo OVADYA Köşe Yazısı
30 Nisan 2019 Salı

Ya savesh ke kada anyo vos esto kontando lo ke azemos en la Grande Sinagoga d’Andirne. Este anyo la semana de las Fondasyones es la primera semana de Ramadan ande los Muzulmanos azen taanit un mez entero. I mozotros, la administrasyon de la Komunidad Djudia damos pransos de “kortadura de ayuno” (iftar) delantre de la meshkita de Selimiye ke es muy famosa i ke fue eskojida por el Unesco i es protejada por esta fondasyon. Este anyo pensamos mizmo de organizar una kortadura de ayuno en Gaziantep ande se topa una sinagoga ke fue restorada komo la Grande Sinagoga d’Andirne ma ke no pudimos emplearla, ni azer una tefila. Despues lo ke estamos azyendo en Andirne, reelmente tenemos un grande dezeo para esta tefila, i mizmo para un otro konserto en esta sinagoga.

Mos fuimos a Andirne un diya antes del konserto i de la ekspozisyon porke deviamos de azer munchas kozas antes del evenimyento. El mizmo diya teniamos una ekspozisyon de kartpostales sovre Andirne. Una ekspozisyon ke fue kurada por Metin Delevi. “Andirne: de la Lingua de las Kartpostales / Kartpostalların Dilinden Edirne”.

Reelmente fue una ekspozisyon muy reushida i un anyo despues vamos a realizar una segunda ekspozisyon sovre esta sivdad kon sujetos diferentes. Keremos azer una seria de livros kon estas kartpostales. Para realizar esta ekspozisyon mueve diferentes koleksyonaryos mos ofresieron sus koleksyones.

Va eskapar mi artikolo ma dainda no empesi a kontar sovre el evenimyento de diya de alhad. Komo mos kedamos dos diyas tenemos la posibilidad de ver la djente ke vyene a vijitar muestra sinagoga. I dias de fin de semana reelmente tenemos mas de kinyentas personas kada diya. Para valorizar esto, metimos un system audio a la sinagoga i una semana despues vamos a tener una banda ande vamos a pueder oyir la istoria de la sinagoga en turko i en inglez. Entre estas eksplikasyones vamos a pueder oyir musikas djudias i sefaradis.

Diya de alhad mas de kinyentas personas se toparon prontos en la Grande Sinagoga. Mizmo izimos la konstruksyon de syertas estrades para ke la djente pueda ver mijor la shena. I kreo ke las kinyentas personas pudieron segir el konserto. Ay vente i kuatro oras ke resivi a lo manko mas de sinkuenta mesajes ande estan alavando la nochada i el konserto para kual vinyeron de mas de dosyentos kilometros. Yasmin Levy kon su boz i kon sus kantes fue reelmente muy apresiada por el publiko. Mizmo los Andirnelis estavan muy kontentes. Serka de dosyentas personas eran de esta sivdad. I es por la primera vez ke los Andirnelis fueron tan enteresados kon un konserto asemejante.

Aparte de esto una komida de ligados kasher fritos a la manera d’Andirne, de koftes i de sarsichas (sucuk) kon diferentes salatas. No se si toda la djente pudieron komer porke kon el mangal es muy difisil de aparejar kozas asadas a mas de kinyentas personas. Aparte de los musafires tenemos la djente ke son responsavles de la seguridad, los shofores, mizmo los polises ke se topavan para la seguridad de la aktivitad.

Malorozamente una damma se kayo abashando del otobus en Selimiye i fue ospitalizada. Dizimos “geçmiş olsun” a la sinyora Morhayim.

 

Siz de yorumunuzu yapın

Tüm Yorumları Görün