La semana pasada kuando resivi el Şalom, torni las ojas para ver mis artikolos en la pajina del Judeo-Espanyol. No fueron publikados! En supito en la otra pajina mis artikolos! I vi ke la semana pasada el Şalom aparesio kon dos ojas en judeo-espanyol. Esto era un esfuenyo para los amantes de muestra lingua. Fue muy ermozo ma no kreo ke puedemos publikar 2 ojas en djudezmo kada semana.
Alhad a la tadre en una sala de konseres ke se topa serka de mi kaza avia un konsyerto de un kuartet de djaz: Avishai Cohen ke es uno de los mas famozos trompetistos (trompet çalan) de djaz del mundo. I malorozamente no topimos bilyetos para el konsyerto. Mas de setesyentas almas korrieron para pueder segir este konsyerto. Avishai es un Israelyano ma kuando vyene a Turkiya, no ay dinguna reaksyon porke es Israelyano o por ke son Israelyanos kon sus amigos. Esto es la universalidad de la muzika. I es difisil de entender i de ver tantos mansevos ke estan enteresados en la muzika de djaz i en este muziko. A la fin reushi a entrar a la sala kon una envitasyon ke me dyeron.
La semana pasada estavamos okupados kon el djornalisto Kashikchi ke fue matado en el konsulato de la Arabia Saudita en Estanbol. Reelmente es por la primera vez en el mundo ke una persona fue matado en un konsolato.
Los anyos dalkavo tenemos lideres ke dirijan payizes ma ke no son personas muy demokratikas ni lojikas. Se komportan komo keren. Son muy leshos de la diplomasia. I esto es un malor para la umanidad. No savemos lo ke puede afitar amanyana.
I el malor el mas grande es ke lo estan azyendo idare al rey o el prens del paiz por ke esta merkando una grande kuantitad de armas de los amerikanos.
Kreo ke los payizes kon estos lideres no deven de gastar tanta moneda para los diplomates, porke no tyenen el mizmo rolo ke tenian mizmo dyes anyos antes.
Muestros ijas/ijas i inyetos no van a topar el mizmo repozo ke bivimos mizmo si no fuimos kontentes.
