Rosh Ashana el empesijo del invyerno

Silvyo OVADYA Köşe Yazısı
5 Eylül 2018 Çarşamba

Noche de lunes (alhad a la tadre) vamos a fiestar el muevo anyo. Toda la famiya van a estar endjuntos para fyestar este evenimyento. Van a komer en la mizma meza empesando a komer una kuchara de dulse… Mi ermana ke le plaze gizar mos va ofreser a lo manko diez diferentes komidas. I esta primera noche no es possible de propozar a mi ermana ke mozotros azeremos este pranso la primera noche de Rosh Ashana. Toma un grande plazer azyendo estas todas komidas i dospues va estar kansada unos kuantos diyas. Kada anyo deve azer una mueva koza al pranso ke es determinado.

  Una partida de los ke moran en las islas abashan de la kampanya una semana antes de la fiesta. Ma ay bastante djente ke les plaze pasar las fiestas en las adas. Mizmo se kedan en Kipur porke pensan ke es mas kolay el tanit en la ada ke en la sivdad.

  Las famiyas ke tyenen kreaturas ke se van a la eskola - mizmo al lise - deven de abashar porke oy en diya las eskolas son muy seryozas. Mi eshuegro mos kontava ke kuando estavan en la ada ochenta anyos antes se ivan un mez entero a la skola de la ada kon sus ermanas. I los ijikos i ijikas no teniyan derecho de kesharsen. Oy en diya devemos de demandar permision de las kriaturas para dar una desizion; i kuando azemos una koza por muestra kaza mi ijo mos dize de ke no me demandatesh? I yo so miembro de esta kaza. Puedeser es djusto lo ke esta djuzgando ma mozotros no vimos esto en muestra chikes.

  Diya de alhad estavamos envitados a una boda en la ada. I en muestra meza estava asentada la direktrisa de la eskola grega de la Ada ande sinko elevos estudian. Esta damma, Nikolaidis, avlando kon mi mujer se ambezaron ke mi mujer kuando teniya kuatro-sinko anyos moraron en sus kazas. Su padre era un enjenyer de konstruksion ke fraguo munchos apartamentos en la isla. I su echo era fraguar i alkilar. I esta damma konto komo los djudyos antes embiyavan flores a sus paryentes i a sus amigos kuando era Rosh Ashana. I le konti oy en diya los djudios se izyeron mas meoyudos i al lugar de embiyar flores para ke el floristo se aga riko toparon el sistem de embiyar kartas i las asosyasyones de bienfezensya profitan bastante de este movimyento.

Vos kero dizir “Shana Tova” i espero ke este anyo vamos a kontinuar muestros artikolos en djudezmo.

 

 

Siz de yorumunuzu yapın

Tüm Yorumları Görün