Vayeşev

Rav Yeuda ADONİ Köşe Yazısı
10 Aralık 2014 Çarşamba

Entre todos los ijos de Yaakov, el mas savyo i entelijente de todos era Yosef el primer ijo de Rahel. İ su padre seya por su entelijensa  seya por ke era regalado de su madre lo amava mas ke a todos sus ermanos. İ en sinyal de su amistad le izo una kamiza de una ropa muyfina i muy ermoza. Lo ke no izo a ninguno de sus ijos.

Vyendo esto las ermanos de Yosef, entraron en selo kon Yosef, i lo aboresyeron  muy munço.

Yosef, a un ke era muy savyo i entelijente se konteniya un poko sovre sus ermanos, vyendo de una parte ke el era mas entelijente ke eyos, i de otra parte, la amistad ke le mostrava su padre, mas ke todos sus ermanos.

En este enterval se sonyo Yosef dos suenyos. Los kualos demostravan ke el teniya ke ser sinyor i podestador de sus ermanos. İ el no no se travo de kontarlo a su padre i a sus ermanos.

Este konporto de Yosef no izo mas ke pujar el selo i la aboresyon de sus ermanos kon el.

 Un diya estando los ijos de Yaakov Avinu paseando sus ovejas en Shehem komo sus uzo, kedaron mas tadre en el kampo; no vinyeron a kaza en su ora.

Yaakov, pensando no seya ke uvo de nuevo alguna rebuelta kon la cente de Shehem, le dize a Yosef, ke vaya a traerle enformasyones.

Yosef a un ke ya saviya ke sus ermanos lo aboresiyan, no refuzo el komando de su padre, i se fue para Shehem.

Sus ermanos ke lo vyeron de leshos vinir solo onde eyos, les pujo mas akeya ora el selo i la aboresyon. Se detirmenaron de kitarlo del mundo.

Sovre el konsejo de Reuven uno de los ermanos de no matarlo kon sus manos, lo echaron a un pozo ondo vaziyo ke aviya en el kanpo, despues de deznudarlo i kitarle la kamiza fina ke le izo su padre en sinyal de su amistad. I todos los yoros i rogativas de Yosef a sus ermanos fue sin ningun proveço.

Estando Yosef en el pozo, paso por ai merkadores ke viniyan de Midyan, i los ermanos lo venden a Yosef i lo yevan a el Ejipto.