La perasha nombrada Tazria trata de syertas yagas ke puede afitar en las personas i ansi empesa el kapitolo.
I avlo el Kriyador a Moshe i Aaron dizyendo: kuando un ombre tuvyera en el kuero de su karne komo yaga de lepra, sea traido a Aaron el Koen o a uno de sus ijos, los Koanim.
Dunke de este verseto de la Tora se entyende ke el Koen se devia de okuparse kon semejantes yagas. El Kriyador envelunta syempre la sanedad de la persona. Komo esta dicho: Tu enveluntas el arepintimyento de los malos i non sus muertes. “Va dizeles a eyos”, disho el Kriyador, “Yo envelunto la vida de mis kriyansas”. El Kriyador envelunta ke nos entremetamos en la ley, i ke afirmemos las enkomendansas komo esta eskrito.
El Kriyador envelunto ke por su djustedad se engrandesera la ley i se enfortesera. Kuando kriyo el Todo Poderozo el mundo, ansi es dicho: i yamo el Kriyador a la luz “diya”, i la eskuridad “noche”. El nombre de el Kriyador este en la luz i no en la eskuridad. La luz es vidas, alegriya i bondansa, no komo la eskuridad. Por tirar la atansyon de el ombre ke no esta korrekto, por un sinyo le mandava en el kuerpo una yaga nombrada “lepra”. En primero via manchas en las paredes de su kaza. Si se konsintiya i tornava a el kamino derecho, era perdonado. Ainda si no pudo entender sus defektos, via estas manchas en sus vistidos puede ser.
Tornava en teshuva i el Kriyador lo perdonava. Ultimamente es ke la via en su kuerpo. El midrash dize: El Kriyador es piadozo, patron de las piadades malgrado nuestros defektos, el nos perdona sovre nuestra buena veluntad de Teshuva arepintimyento.
El Kriyador envelunta ke bivamos vidas de santedad, de limpyeza. Sovre todo de ser akavidados de todo lo ke va salir de nuestra boka; de no pensar i avlar mal por ningunos, ke puede santrear munchos males. Komo meldamos en los perakim ke disho un savyo Shimon Beno, “no topi para mi salud, mas ke estar kayado, lo matsati lagus tov, el mishetika.
Seslendiren: Karen Gerson Şarhon
