5 Ağustos 2020 Çarşamba 22:22

La desgrasya de la natura

Silvyo OVADYA Köşe Yazısı
15 Ocak 2020 Çarşamba

Ay unas kuantas semanas ke vos esto kontando sovre las luzes de las Hanukiyas, o vos esto kontando syertos evenimyentos kulturales, avlando mizmo de ves en kuando sovre el muzeo. Ya basta tantas patranyas. En Australia una grande partida del teritoryo esta amenazado kon los fuegos terribles ke se estan realizando. Malorozamente un tereno ke fue destruido por el fuego es dyes vezes mas grande ke la superfisia de Estanbol. Es vedra ke la superfisia de la Australia (8.600.000 km2) es serka la mizma grandor ke la superfisia de la Evropa (10.180.000 km2); ma en la istoria de este kontinento no vimos una desgrasya asemejante. La semana pasada en las novedades estavan avlando del nombre de las bestyas ke se muryeron durante estos fuegos. Sintimos en la radio i una ora despues mi sovrino me disho, mira kuantas bestyas se muryeron! Mas de 500.000; le dishe, no es djusto lo ke te estas akodrando. I miri en el internet: la kuantidad era kinyentos milyones. Inkreivle! Kuando meldi esto, demandi a todos “kon las moshkas o sin las moshkas”. Reelmente es un shifro ke no puedemos imajinar. No se ke modo de bestias se topan entre estas. La Australia es el payis ande se topa lo mas muncho de kodreros i la mijor lana en el mundo es la lana australyana. Komo esto produsyendo ilos para tekstil, telefoni a unos kuantos vendedores de lana para demandarles lo ke va afitar. Me disheron ke los kodreros no biven en las sharas. No se si es djusto lo ke me kontaron, vamos a ver lo ke va afitar.

La semana pasada aviya un evenimyento muy emportante para los ke keren byen las bestyas. Dyeron karar de matar i de enterrar miles de gameyos. Matar gameyos! No vimos esto en muestra vida. La razon es porke los gameyos beven una kuantidad muy emportante de agua. I komo dospues de estos fuegos tyenen una grande mankura de agua, la djente no kere partajar kon los gameos i los kavayos la agua ke les kedo. Reelmente savemos ke la Australia era un paradiso para todos. Para los ke moran en este kontinente i para los turistos ke vijitan este payis. No pudimos vijitar este kontinente ma kuando era chiko, mi ijo keria ir a la Australia para ver los kangurus. En la radio avia un program ande un meteorologo estava avlando sovre las nuves de fuego ke estan sirkulando en los syelos. Malorozamente no estan puedyendo krear las luvyas. Estas nuves estan yenos de relampagos, i komo los terenos estan sekos estan kreando los fuegos. Estamos sintyendo ke estas nuves se estan indo mizmo a la Nueva Zelanda. Espero ke esto no va ser el empesijo de fuegos en esta isla. Kon esta mala okazyon mos ambezimos ke la Australia no tyene una organizasyon profesyonal de amatar fuegos. Ay muncha djente ke fueron ensenyados sovre este sujeto i kuando ay un fuego lavoran diya i noche komo profesyonales.

Oy en las novedades sinti ke las luvyas empesaron i ke el tyempo esta mas fresko. Es djusto ke estan en el empesijo del enverano ma komo dizen las autoridades, este anyo es posivle ke el enverano no se realize komo fue un evenimyento asemedjante 140 anyos antes en una otra parte del mundo.

 

 

 

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİNİZİ ÇEKEBİLİR

gazete sayfası

Tünelin Ucu-İzel ROZENTAL

Tünelin Ucu-İzel ROZENTAL