25 Eylül 2020 Cuma 13:00

Las Kandelas de Hanuka en Antep i en la Kula de Galata

Silvyo OVADYA Köşe Yazısı 1 yorum
31 Aralık 2019 Salı

La semana pasada era la Fiesta de las Luzes i se selebro de esta manera. En el Şalom, de dos  semanas antes vos konti sovre las aktividades ke se van a realisar. I se realisaron. Ma vos kero kontar sovre las dos aktivitades ke se realisaron en las kayes. La sigunda en la Kula de Galata si tengo dainda lugar para eskrivir. Oy en diya puedeser ke no es muy espesyal de asender las kandelas de la Hanukiya en las kayes. Ya vemos mismo en los videos un alay de Amerikanos Djudios en las kayes de Los Angeles kon syenes de karros kon la Hanukiya asendidas ensima de los tavanes de las arabas.

Ma esto no es la misma koza para mozotros Djudios Turkanos. Dyes anyos antes era mi suenyo de asender una Hanukiya en Nişantaşı, en la kaye Abdi İpekçi ke miles i miles de personas vijitavan antes del Anyo Muevo. Es el Presidente İzak İbrahimzade ke realiso esto kon su ekipo sinko anyos antes en Beşiktaş debasho de la meshkitade Ortaköy. I kada anyo se esta realisando en un kuartier diferente de Estanbol. 

Pensar de asender una Hanukiya en Gaziantep no era mizmo un suenyo. Esta Keila fue fraguada en los anyos 1873 -1876. En diferentes dokumentos topamos datas diferentes. Despues de unos kuantos siglos, los Djudios abandonaron esta sivdad i esta sinagoga en los anyos 1980. I una fragua abondonada es kondanada a derrokarse. I es lo ke afito. En el anyo 2011 kon el apoyo del primer ministro Erdoğan i kon los esforsos de la Direksyon de las Fondasyones, esta Sinagoga fue restorada i en el 2012 metyeron una plaka en su puerta para mostrar ke es el edifisyo de la Keila de Antep. Ya se ke ay anyos ke keremos organisar aya una orasyon ma esto no fue posivle. El direktor de la rejion de las Fondasyones, el edifisio fue dada para ke la Universitad lo empleye, despues lo dyeron a una otra ovra asta ke el Ofisio del Presidente dyo karar ke se puede azer una orasyon en este edifisio, la Sinagoga de Antep. Kinze anyos antes kuando izimos un viaje a esta rejion pudimos vijitar las ruinas de esta sinagoga.

El 26 de Desembre kon los esforsos de Murat Nihmat – un halis Antepli – ke se okupa muncho kon esta Keila i ke realiso un syerto tyempo la restorasyon del kal del Talmud Tora en Şişli - lavoro muncho, mizmo kon el pranso para ke se realise una seremoniya perfekta, i lo realiso. Trusheron de Estanbol kuatro Sefer Toras, de İzak İbrahimzadeh, uno de los presidentes de muestra komunidad (tenemos dainda dos presidentes), i el arkitekto Yusuf Kohen ke es el direktor de la Fondasyon de Neve Şalom. Es siguro ke ay muncha mas djente ke lavoraron para realisar esta seremoniya ma kije sitar solo los mas primordiales.

Malorosamente el mismo diya keria vijitar la Sinagoga de Kilis ke fue restorada, i ke la restorasyon se termino una o dos semanas antes, ma komo la demanyana avia una bruma terivle en el Aeropuerto de Gaziantep bolimos aya sinko oras mas tadre. A penas ke vinimos a Antep vijitimos el gobernador, el Sinyor Davut Gül. Mos resivio muy bueno. Despues de esta vijita vijitimos el Simiteryo de Antep. Reelmente es diferente de los otros simiteryos i no se topa nombres ensima de las piedras. Demandi komo topan las tombas de sus paryentes? Me respondyeron: “Ya Saven”. Despues de la Orasyon del Arvit, elHahambashı İsak Haleva, el Sinyor Murat Neihmat i el Sinyor Arkadaş, el Sinyor Bülent Özsezikli entraron en la Sinagoga kon los sonos de los shofares. Despues ke se meldo un pasaje de la Tora, las Toras se metyeron al Ehal aKodesh kon la orasyon “Mizmor le Davit”. Todos estavan yenos de emosyon. Syertos riendo i syertos yorando.  Es el Sinyor Moris Levi ke meldo en turko el “Berih Sheme” i el Hahambashi Haleva mos dyo la “Beraha Lekaal”.

  Despues avlaron los Sinyores Yaşar Bildirici ke su famiya es orijinarya de esta sivdad, i el president İsak İbrahimzadeh mos avlo i mos emosyono muncho kon sus palavras. Rengrasyo el buro del Presidente por sus esforsos para la realizasyon de esta seremoniya. La Sinyora Adel Arkadaş Kohen, ke vino de Israel,  avlo al nombre de los Anteplis i de los anteplis ke biven en İsrael. Mos konto ke kozinan  dainda las komidas ke komiyan en Gaziantep i sus inyetos i inyetas ke no konosen esta sivdad konosen muy bueno la savor de las komidas i si se gizo savroso dizen “Es Halis una komida Antepliya”. Eya ke eskrivyo en ebreo un livro sovre las komidas Antepliyas me aprometyo de darme un livro para muestro museo.

En esta seremoniya estavamos mas de syen personas i trenta, kuarenta Anteplis vinieron de Israel para  partisipar i este grupo kon los Anteplis d’Estanbol se kedaron fina la fin del dia de Shabat aziendo las orasyones. Despues se dyeron syertos regalos - el livro de İzzet Keribar sovre las fotografias ke tyene komo kontenido la Turkiya- a syertas personas ke ayudaron muestra komunidad para la realizasyon de este diya.

Despues se asendyeron las sinko kandelas de la Hanukiya en la guerta. Fue una shena muy emosyonante. El Governador de Antep el Sinyor Davut Gül i la Presidente de la Munisipalidad apenas ke torno de Ankara, partisiparon a la komida ke fue organisada por el Sinyor Murat Neihmat. Una organizasyon i una komida maraviyosa. Estava muy triste porke abondoni la komida para tomar el avion.

  Espero ke esta keila se va pueder vijitar por los turistos Turkos komo estranjeros,i kada uno va pueder vijitar esta sinagoga ke sirvio la komunidad serka de syen anyos. Kero rengrasyar una otra vez el Sinyor Nihmat i muestro presidente İbrahimzadeh por sus esforsos.

 

 

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın

İLGİNİZİ ÇEKEBİLİR