Vayetse

Rav Yeuda ADONİ Köşe Yazısı
14 Kasım 2018 Çarşamba

Despues de estar Yaakov 14 anyos en la kaza de Ever, se fue a Haran onde Lavan su tiyo, sigun el komando de su padre i su madre. Tuvyendo avizo Esav ke Yaakov esta indose a Haran, manda a Elifaz, su ijo ke lo presigya en el kamino i ke lo mate.

Elifaz no manko de azer el orden de su padre i se fue kon muncha djente a presigir a Yaakov. El Dyo santo estuvo en ayuda de Yaakov, i se kontento Elifaz de deshar bivo a Yaakov en tomandole todo lo ke teniya i se torna a su lugar.

Ansi es ke Yaakov, lo pudo konvenser a Elifaz a ke lo deshara en vida.

Elifaz le dize a Yaakov su tiyo, mi padre me ordeno de matarte, no puedo pasar el orden de mi padre si no ke ovedeser. Yaakov le responde si dizyendo: ay una palavra ke dizen, “ani hashuv kamet”. El prove asemeja a el muerto. Dunke si me tomas toda la azyenda ke posedo, es komo me mataras. I Elifaz toma toda la azyenda de Yaakov i torna onde su padre.

Yaakov arivo a Haran, i vyendo a Rahel, la ija chika de Lavan paseando en el kanpo las ovejas de su padre, se dyo a konoser kon eya, i tuvyendo avizo Lavan su padre, se lo yevo a kaza kon muncha kerensya. I estuvo en su kaza serka un mez. Entremyentes estuvo Yaakov paseando los ovejas de su tiyo en lugar de sus ijas. Lavan no kijo ke Yaakov le sirvyera debaldez, se metyeron de akordo, ke estuvyera Yaakov kon sus ovejas 7 anyos i darle en paga a Rahel, su ija por mujer.

Despues ke termino Yaakov sus 7 anyos kon las ovejas de Lavan sigun sus akordo, le demando a Lavan ke le dyera a Rahel por mujer sigun su kondisyon. Lavan ke era un ombre embrolyador i enganyador le dyo a Lea, su ija le grande en lugar de Rahel. Este konporto de Lavan le desplazyo muncho a Yaakov i kedaron de akordo kon kondisyon ke va lavorar Yaakov otro 7 anyos, i Lavan le va dar a su ija chika, Rahel.

 

 

 

 

Siz de yorumunuzu yapın

Tüm Yorumları Görün