Un kongreso sovre el Djudaismo i Israel

Silvyo OVADYA Köşe Yazısı
31 Ekim 2018 Çarşamba

El anyo pasado en el mez de Disembre un akademisyano ke lavora en la Universitad Selçuk de Konya organizo por la primera vez un kongreso ke teniya komo tema el Djudaismo i Israel. Era reelmente korajozo de organizar esto. I en Konya. No savemos lo ke afito mizmo si tuvimos la posibilidad de meldar las prezentasyones ke se daron. Para kritikar kale partisipar. I es muy emportante de partisipar a un kongreso asemejante para pueder trokar siertas ideas. A este kongreso fuimos achetados kon Metin Delevi ke izo una prezentasion sovre los Djudios ke tomaron parte en las gerras despues de la Primera Gerra Mondial. Siertas personas pensan ke los Djudios no fueron soldados en la armada Otomana i Turka. El ministeryo de la defensa deklaro anyos antes la lista de los soldados ke fueron matados en las gerras. En la gerra de Liberasyon, en la gerra de Çanakkale ke es una gerra muy emportante i ande pyedrimos munchos soldados.

 Entre las sesenta prezentasiones, una partida era sovre la ley djudia. Puedeser una o dos fueron prezentadas kon un parte antisemitiko. Siertos komunikados tenian una komparezon sovre la Tora i el Koran. Esto es un punto muy danjorozo porke es muy difisil de konvenser un akademisyano ke es seguro ke el Koran es el mas djusto i ke la Tora fue falsifikada o trokada. Si no tyenes buenas entisyones, es posivle de eskojer sinko puntos ande ay una sinyifikasyon primitiva komo matar, derrokar, i otras kozas. Ma si tyenes buenes intisyones, es posivle de topar siertos puntos ke son pozitivos i ke pueden elevar la valor de muestra Tora. Es posivle de azer esto para todos los livros de ley ke fueron eskritos anyos antes. I devo de konfesar ke en un dor asemejante, kale koraje para defender muestra Tora. Sintimos siertos komunikados sovre Israel. Una partida pozitiva, una partida negativa. La ley i el punto de vista de los Palestinyanos kada vez es el problem de las diskusyones. I si kale interpreter kon un grupo ande la mas grande partida tyenen una formasyon relijioza esto es mas difisil.

Ma kuando empesash a avlar i dash a entender, puedesh ver ke estan entendyendo lo ke estash eksplikando i en siertos puntos, voz esta dando razon. En este kongreso la mas grande partida de los akademisyanos kreo ke vyeron por la primera vez un Djudio. Siertos eran de las universitades de Ankara, Sakarya, Erciyes/Kayseri, Çankırı, Kocaeli, Konya/Selçuk-Erbakan, Kırıkkale, Artvin Çoruh, Hatay (Mustafa Kemal), Çorum, Adana (Çukurova)… I un alay de otras universidades. Reelmente no konosemos una grande partida de muestro payis.

Esta eksperyensya fue muy enteresante. Para eskapar, prezenti un komunikado sovre muestra lingua ke avlamos los 526 anyos dalkavo en las tierras Otomanas i Turkas: El Judeo-Espanyol (El Djudezmo).

 

 

Siz de yorumunuzu yapın

Tüm Yorumları Görün