El dia Evropeo de la Kultura Djudia

Silvyo OVADYA Köşe Yazısı
17 Ekim 2018 Çarşamba

Anyos antes, kuando por la primera vez se organizo en el anyo 2001 el dia Evropeo de la Kultura Djudia, reelmente aviya sido un evenimyento ekstraordinaryo para mi i para muestra komunidad. Era el anyo 2001. Empesimos a realizar este dia dos anyos dospues ke se realize en syertas sivdades de las sivdades Evropeas. Es un dia para el puevlo del payis para pueder konoser mijor los sivdadinos djudios de sus payis. Los primeros anyos estavamos organizando en diferentes sinagogas (Neve Şalom, Ashkenazi, Kal de los Frankos - Italyano, Scneidertempel) i en syertos lugares en Galata. El konsyerto de Los Pasharos Sefaradis ke fue realizado en las eskaleras del Muze ke se topava en la Sinagoga Zülfaris fue un dia inolvidavle. Los anyos dalkavo son las dammas de la FKD ke estan organizando este evenimyento kon en Muzeo ke troko de lugar i ke vino al lado del Neve Şalom. Reelmente es una dechizyon maraviyoza. Porke es una grande okazyon para el muzeo, ke kon puertas avyertas esta resivyendo miles de vizitores. Este anyo serka de dos mil personas vijitaron el muzeo i sigieron las konferensias i los konsyertos.

Reelmente es una grande okazyon para los ke keren konoser a los djudios de la sivdad i del payis ande biven. I es una grande okazyon para mozotros para azer konoser muestra kultura i muestos kostumbres.

  Muestra lingua el Judeo-Espanyol es muy emportante para mi i kon los esforsos de Anri Çiprut i Emel Benbasat se realizo una konferensya prezentada por Süzet Herman i Şeli Gaon. Fue una prezentasyon ke fue segida por mas de dosyentas personas i avia syertos miembros ke vinieron de diferentes universitades. Puedo dizir la mizma koza por la prezentasyon de Naim Güleryüz ande prezento sus livros muevos publikados por el Gözlem. La sinagoga yena, el sinyor Naim konto sovre sus rekuerdos buen karar de tyempo antes de prezentar su livro.

  Fue muy enterasente de ver tanta djente vijitando muestro muzeo. Malorozamente kada dia no temenos esta posibilidad.

  Kero rengrasyar a Rozi Ülçer ke enkavesa las dammas de la FKD i a Emel Benbasat ke lavoro muncho para la realizasyon de este dia. Kreo ke si organizavamos syertas aktividades en la kaye komo un konsyerto, el entereso de la djente seria mas muncho.

  I kreo ke devemos de organizar dias asemejantes para dar la okazyon a la djente para ke mos konoskan mijor.

Siz de yorumunuzu yapın

Tüm Yorumları Görün