Una Oja de Muestra Istorya

Silva FİLİBA Judeo-Espanyol
18 Kasım 2026 Çarşamba

Sigun los eskritos, las mujeres no teniyan dinguna  aktivita publika en el tyempo del Beit-Amikdash. Portanto los ke bushkaron, el rolo de la mujer mos ambeza sigun los livros de Nehamya i de Ezra, kijo dizir en el sinken siglo antes la era 

Kristiana,las mujeres akompanyavan a los ombres en las Seremoniyas del Beit Amikdash, ofresiyan dulsuryas, meldavan, kantavan kon instumentos de muzika.

La epoka ke konta Ezra el Skrib, no fue diferente de otras. El topo en los Judyos, vinidos a Yerushalayim i los ke kontinuaron a bivir en la Sivdad Santa, una asimilasiyon desgrasiada, el İvrit  ya no se avlava, la Tora, la vida Judiya, ya no egzistiya mas, se kazaron kon goyes i tuvieron kriaturas de eyos. Ezra de ver esta desgrasya, se arazgo los vistidos i se echo en basho i imploro pardon d’El Kriador por los pekados de sus ermanos Judyos. 

Tornaremos al statuko de las mujeres Judiyas. Serka de la era Kristiana,vemos vinir las mujeres al Beit-Amikdash ke fue renovado, kon instrumentos de muzika, akompanyar a los ombres  en los diyas de Aliyat a Regel (Fiesta de Imigrasion), ke son Pesah, Shavuot kon los Kohanim. Si eran mujeres etranjeras konvertiendosen a las kostumbres judaikas.

Yerushalayim es el sentro de las tres Relijiones Monoteistas.

La primera vijitadera fue una Reyna, ke se avla doz vezes en la Tora, Belkis Mageda de Saba, riko Paiz ke oy se yama Etiopya, kijo konoser al Rey Shlomo el savyo de los savyos, ke dizen de el, ke avlava la lingua de los pasharos mizmo de las plantas.

El Rey arisive a la Reyna de Saba kon una splandor ke no se tyene visto fasta akel diya. La Reyna kon su kortej kon djoyas de Oro, parfumes, piedras  presiozas i todo modo de djente ke Yerushalayim no tyene visto. Se prezento al Rey Shelomo, vistida de siete fostanes uno enriva de otro, kon kolores ke no se konosiya en esta epoka. I el Rey Shelomo enkanto kon su saverisyo. La Reyna de Saba disho: Kero rengrasiar a vuestro Rey Bendicho. Mizmo ke estas palavras no son muy klaras,  kijo onorar al Kriador. Munchas istoryas, lejendas fueron eskritas  de esta vijita. Kon el Rey Shelomo i la Reyna se pense ke uvo un kazamyento, i kon los doz Reynados. Poko despues la Reyna torno a su Reynado ande la asperava su puevlo.

La istorya mos konta ke de esta unyon nasyo Menelik el Primer Rey de Etiyopya. Kuando se engrandesyo i vino a vijitar a su Padre, todos se enkantaron  de ver  a kel punto  paresiya al Rey Shelomo.

Mos akodraremos ke en la Bandyera Etiyopyana se topa un Leon komo la Bandyera de Yehuda.

Los dalkavos anyos kon la operasyon ke se yama Shelomo, los Falashas vinidos de Shelomo i Belkis Magedo de Etıyopya vinyeron, se  instalaron komo ijos verdaderos de esta Nasion.

  Aserkandomos de Hanuka vos oguro de agora fiestas alegres!

         


Siz de yorumunuzu yapın

Tüm Yorumları Görün