Ioanna Kuchuradi nasyo en el anyo 1936 i muryo en 2026. Era una filozofa i miembro del profesorado de orijin grega ke biviya an Turkiya.
Empesando del anyo 1980, izo la Presidensya de la Sosiedad Filozofika de Turkiya.
En la universita de Maltepe, era direktora del “Sentro de Investigasyon de los Derechos Umanos”. Spesialmente, los derechos umanos, la filozofiya del umano i la etika eran los sujetos ande izo munchos lavoros.
Eya nasyo en una famiya grega en Beyoğlu. La sinyifikasyon de su nombre es: Ioannes (el regalo del Dio), la alkunya ke su ekivalente en turko es “Kütükoğlu”.
Su padre, era el ijo de un imigrante de la izla de “Samos”, i su madre era ija de una famiya ke emigro de Çorlu a Estambol kuando teniya kuatro anyos. Su padre era farmasyen. Su famiya peryo una parte de sus byenes en 1942 kuando aviya salido la ley de fortuna.
En el anyo 1959 eya termino la Universita d’Estambol, el Departamento de Filozofiya i empeso a lavorar komo asistente del “Prof. Dr. Takiyettin Mengüşoğlu”.
En 1965 preparo una tez nomada:
“Schopenhauer i el problem del ombre en Nietzsche”,
i se izo doktor. En la universita “Hacettepe” en Ankara se izo Profesor en 1978. En 1983 fue elejida para formar parte de la djunta direktiva de la “Federasyon Internasyonal de Sosyedades Filozofikas” i dyez anyos fue la sekreter jeneral. Despues sinko anyos fue la prezidente de esta federasyon. Fin ke se muryo tuvo el titolo de
Prezidente Onoraryo.
En 1969 establesyo el departamento de filozofiya en la Universita de Hacettepe. Fina el anyo ke se izo retretada en el anyo 2003, izo la prezidensya de esta seksyon. A parte de esto en 2015, la universita ODTU le prezento un premyo de “Distinksyon Espesyal del Senado”.
Eya lavoro en munchas asosyasyones i organizasyones komo prezidente i fue muy reushida.
Despues del servisyo komemorativo, la enterraron al simeteryo grego ortodokso de Şişli.
Unas kuantas palavras de Ioanna Kuchuradis.
Lo mas difisil del mundo son las relasyones umanas.
Saver ke uno esta pensando en ti es importante, es una koza muy kayente.
Todas las negriruras del mundo provyenen de la inyorensya, i la buena veluntad si no se illumina, puede kavzar muncho danyo komo el mal.
La dinyita umana no se trata de lo ke te vyene a la kavesa, se trata de la postura ke adoptas por una koza ke vyene a la kavesa de la otra persona.
La noblesa no depende de ande vyene la persona, si no depende de ande se dirija.
Si damos lugar a la filozofiya en la edukasyon, Turkiya va ser un paiz diferente despues de vente anyos.
Una puerta ke se avre, serra otra puerta.
Mizmo ke la filozofiya no konvierte el mundo en un paradiso, puede trokarlo konsiderablemente.
Estamos sufriyendo las konsekuensyas de muestra inyorensya.
Antes de la edukasyon profesyonal, kale dar la edukasyon de la umanita.
El sol briya tanto para las buenas komo para las malas personas.
La proteksyon de los derechos umanos depende de los individuos i de los Estados.
Para stimular la kreativita, nesesitamos personas ke resivyeron formasyon en pensamyento filozofiko.