El mundo ande se esta indo no savemos, ma savemos ke no kedo ni respekto, ni amistad, todas las karas estan amargas, la esperansa malorozamente avagar, avagar de si para si se esta derretiyendo. Aaammmann djanum mozos miraremos las oras ke pasamos, por esto dishe ke oy un poko riyeremos, porke tenemos muncho de menester. Ijikos en vezes dizen ke dospues de ochenta el meoyo empesa a baylar, i a saltar. Desha ke avlen, todo es mintiras, no vas a dar metalik, papu su madre a la meyana. Ken kere ke avle por vyejes. Ma agora lo djusto vos dizere, en vezes kuando esto vinyendo de la kaye, al lugar de kitar los kalsados, me esto abashando el pantolon. Una vez este modo me vido el ijo me disho padre ke estas azyendo, el meoyo desho el baylar, i vino en su lugar, le dishe tengo muncho pishar por esto me esto aparejando i empesi a koryer al banyo de mentiras, en vezes ya puede afitar este modo de kozas. Aaaman djanum komo keres bive, komo keres kome. En vezes kuando empeso a pensar muy ondo, dospues lo fuyo por mi vida. Si esto komyendo koza kon asukar esta furladeyando la glisemiya, si esto komyendo koza kon sal, esta furladeyando la tansyon, si bevo muncho agua esto koryendo a la tualet para pishar, si komo un poko demaziya me esto engodrando, si no komo, esto komo eskayido, me disheron kome solo vedrura i salata, i akeya vez me esto sintyendo komo una vaka, kualo azere no se, aammman djanum aze lo ke keres digo de mi para mi. En vezes del salon me isto indo a la kamareta de lavorar para tomar una koza, kuando vengo a la kamerata me esto olvidando, empeso a pensar, deke vine aki, torno atras, i salgo de la kamareta, en el kortijo me vyene al tino de kuala kamareta sali, penso penso no lo topo i en baylando vengo al salon. El otro dia en la kaye me travo el korason un sandwich hot dog, i entri a un bufe tomi el sandwich i le di 100 liras, me dyo atras 10 liras en komyendo el sandwich kon la 10 liras me alimpyi la boka i lo echi al chop, i el papel del sandwich lo meti al portmone. Eeee kualo ay babam en vezes ya puede afitar este modo de kozas. El oto miyo syempre esta delantre de la botika, la otra noche sali de la butika alevanti la mano se areto un taxi, i me suvi, me trusho a kaza. Dospues de komer sali al balkon para bever un kafe, esto mirando abasho el oto no esta, no esta no es, en gritando le dishe, Furtuni el oto lo arovaron, kualo ke me diga, no te merrikiyes syertamente te lo olvidates delantre la butika, me areti; si ya teniya razon, aammman djanum en vezes ya puede afitar este modo de kozas. Me disheron kale ke aga spor, si ago spor kon estos anyos, para asentar, i alevantar kale ke uno me ayude, si no ago mas medra, si me eskrivo a un klup de spor, empesa a yorar la aldikera, aammman djanum desha asi bivas tu. Un dia el meoyo aze cha cha cha, un dia aze tumba, en vezes se kansa i se repoza, i este modo pasan los dias, kon los anyos en un kamino de la vida sin saver. Rogaremos al Dio ke kada dia avriremos el ojo kon sanedad i kon alegriya. Syempre riyendo, i orozos ke estesh.