UN AKONTESIMYENTO

Eliz GATENYO Judeo-Espanyol
18 Kasım 2026 Çarşamba

Oy vos kero kontar lo ke le afito a una konosida. Komo entra la kavesa en bela de una persona, sin kulpa i sin pekado. 

Esta konosida entro una noche a kaza del lavoro i remarko ke le kedo la jaketa en el buro. Komo a la demanyana teniya ke irse a otra sivdad por echo, teniya de menester de la jaketa. Se disho: En sinko puntos ire a tomar la jaketa i tornare. Se suvio a su oto, ayego al buro, parko el oto al lado del buro ke aviya komo una kalejika sin salida, entro al buro, tomo la jaketa i salyo. No sureyo ni sinko puntos. Eya ke sale, ke ve? Un otro oto,  parko djusto detras del suyo. No esta puediendo salir. Aspero un poko, yamo, klaksono, no ay dingunos. Telefono a la polisiya de trafiko. Vino la polisiya pishin. Miro por aki, miro por aya, no ay dingunos. En supito, salyo un ombre en medyo, kon una poshet de Schnitzel. Disho a la polisiya: Yo so kurye, va deshar este paketo i va salir. Vos rogo de no eskrivirme djeza, i se fue. Aspera aspera no ay dingunos ke vengan. El polis se fue a bushkar al ombre. En akel momento vino el ombre en la mano kon una poshet preta, la metyo debasho de una siya ke aviya un kafe por aya. I se desparesyo de muevo. Torno el polis. La konosida le konto ke vino akel ombre i desho por aya una poshet i se desparesyo pishin. El polis topo la poshet ma no la toko, yamo a otros polises. Avagar avagar, avyeron la poshet i toparon shiringas i un polvo ke era drogas. El echo se agravo. El oto ke dainda estava aya, no estava  enserrada,  la avriyeron i toparon muncho mas polvos. Se yamo otra seksyon de polisiya, la egzaminaron i yamaron un oto de remorke i se lo yevaron el oto. Ampesaron a bushkar todas las kalejas del entorno para toparlo al ombre. Ya lo toparon i lo yevaron al komiseriya. Sovre esto, la konosida muestra, disho grasias al polis, i kijo entrar a su kaza. El polis disho “Noo! Agora no puedemos desharte, vas a vinir kon mozotros, vas a azer una deklarasyon i vas a sinyar papeles. Ansina se le fue la nochada entera en la polisiya. Al diya se fue a su viyaje sin durmir.


Siz de yorumunuzu yapın

Tüm Yorumları Görün