La artista ke vos va kontar esta semana nasyo el 24 de Avril 1942. La parte del padre vyenen de Galichya ke es oy Poland i Ukraina. La famiya de la madre vienen de Rusya. Son Djudyos Ashkenazis. El papu era Kantor en Rusya. Un anyo despues ke nasyo se le muryo el padre. Puedemos dizir ke kedaron sin paras i eran proves. La madre estava lavorando para mantenerse ma no estava puedyendo abasteser. De lavorar muncho no estava puedyendo enteresarse kon la ija. Barbra konta por la madre kuando era chika ke keriya kerensiya de la madre kada vez le dava a komer ma no le viniya al tino de darle kerensiya.. Por esto dize me engrandesi sin kerensiya. La madre teniya muy ermoza boz. Este talento le pso i a la ija. Barbra tambiyen teniya ermosa boz. Kuando era chika se iva a la eskola de los Djudyos en Brooklyn ke era Yeshiva. De akeyos anyos keriya azerse famoza. Se iva a los filmos a los Teatros. Porke teniya boz ermoza la yamavan a las demonstrasyones de la eskola o si no a las asosyasyones de Djudyos, a las bodas. En primero ke no keriya la madre ke se aga artista kuando oyo i vido ke esta riushendo, la sostono. Ama eya keriya azerse artista de filmos. No le estava abastando solo kantar. Estava lavorando i ambezandose de las artistas ke le plaziya. Komo se puede azerse artista, komo pudiya azer rolo bueno, komo puediya baylar tambiyen en kantando i djugando. Keriya provar a la madre ke puede riushir. A los produktores les estavan plazyendo la boz i las aktuasiones ma le diziyan ke la nariz la teniya muy feya i ke kalia ke se aga estetik. No aksepto nunka. Unos kuantos anyos kanto en los bares. En el anyo 1964, torno de muevo a Brodway kon el muzikal, Funny Girl. Kon este muzikal ke tambien izo el filmo, empeso a enalteserse. En los anyos 1969 kon el muzikal Hello Dolly, se izo artista bushkada. Empeso a djugar kon los artistos grandes komo Paul Newman, Sidney Poiter, Steve McQuin. 2 vezes gano el Oskar ke es el mas grande kompetisyon de los filmos.
De aki puedemos ambezarmos solo kon la vizyon de la ermozura o sino kon la boz maraviyoza se aze la persona famoza. Si tienes kapachita i lavoras kon ardor i sin enfasyar te puedes azer konoser por el mundo entero. La muzika del filmo Women in Love en el anyo 1980 lo kanto Barbra. Munchas kantikas de los muzikales komo Cats izo inskripsyon a las plakas. En los diyas de Yamim Norayim ke meldamos Avinu Malkenu, Barbra lo meldo a la plaka. Komo lo meldan los Ashkenazes. Agora komo vos digo komo kada vez metevos de Youtube la kantika Women in Love i pensavos la vida ke bivyo la artista grande Barbra.