El famozo tenor italiano Luciano Pavarotti fue uno de los artistos rekordado no solo por su boz manyífika, ma tambien por ser una persona kon un korason grande. Su boz aviya emosyonado miles de personas.
Un dia, una istoria partikular amostro su amor por la umanidad. Pavarotti estava kantando en una sala de konsertos, kompletamente yena, kon 18.000 personas. Todos estavan esperando a oyer la boz del grande maestro. La orkestra ya estava pronta, las luzes se avian amatado i el konserto avia empesado.
Pavorotti avia empesado a kantar. Antes del konserto le avlaron de una kreatura de siete anyos ke estava muy hazino. Los doktores le avian dicho a su famiya ke le avia kedado muy poko tiempo. Uno de los dezeyos de la kreatura era oyer a Pavarotti en persona.
Por modo ke estava hazino, la kreatura no pudo asistir al konserto, estava echado en el opital. Pavarotti se emosiono muncho. En medio del konserto les konto a los oyentes la situasion de la kreatura i izo una promesa ke se iva ir al ospital el dia sigiente i le iva kantar a la kreatura.
Esta promesa no era solo un djesto de buendad. Pavarotti, deshando de lado todo el esplendor del konserto, se avia desidado de realizar el ultimo dezeo de una kreatura.
A la manyana sigiente, el tiempo estava muy yelado. Las kayes estavan kuviertas de inyeve. La djente no keriyan salir de sus kazas. Ma Pavorotti no aviya olvidado su promesa. De las primeras oras de demanyana, ya estava en la puerta del ospital. Se fue a la kamareta de la kreatura i empeso a kantarle. Las personas ke se topavan en el ospital se sorprendieron i se emosionaron muncho de esta vijita inesperada. La noche antes, miles de personas avian aplodisado el grande artisto. Agora, el estava aya, kantando solo por un chiko.
La valor de este momento era muncho mas grande de una sala yena de djente. Porke esta vez no avia fama, ni moneda, ni sukseso. Avia solo amor, umanidad i kompasion de una persona por otra.
El komportamiento de Luciano Pavarotti mos akodra una verdad muy emportante: a vezes, la mas grande koza ke podemos azer por una persona es solo estar aya, a su lado.
Kantar por miles de personas es un grande sukseso. Ma el mas grande arte es poder yegar al korason de una sola persona.
Porke la mas grande grandeza es deshar una ermoza marka en las vidas de los otros.