El padre estava lavorando en la stasyon de los trenos en Aydın. En un aksidente se muryo. Un mal ke no venga a la persona. Ay un biyervo “Mallebi si komes, te se rompe el diente”. No abasto ke se muryo el padre, la kaza ande estavan morando se kemo. La madre para mantenerse i para topar un echo vino a Izmir. No pudo topar un echo, por esto lo desho a la kreatura al Orfelinato porke dainda teniya 4 anyos. Kuando se engrandesyo i empeso a la eskola, izo aprendizaje en los tiempos ke estava libero. En este tiempo se estava ambezando el Fransez i empeso ambezarse a tanyer la gitara. Kuando vino los anyos de azer askerlik, se fue a Akhisar i estava en el “Salon Militar” kantando kantikas kon la orkestra i tanyendo gitara. Despues ke eskapo el Askerlik, empeso a lavorar en el Gazino ke aviya en İzmir, Kordon ke se yamava Marmara Gazinosu. Despues de Izmir empeso a salir a la shena en Ankara i Estanbol. No estava ganando munchas paras, porke dainda no se konosiya muncho. Por esto estava kedando en una pansiyon de una kamareta. Para pagar mas poko estava morando kon una otra persona. El estava lavorando las noches en el gazino, estava vinyendo las demanyanas, la otra persona ke era funksyonaryo se estava indo al echo temprano, por esto no se estavan viendo i ni se konosiyan. Ama le estava konvinyendo porke se estavan partajando la kira de la kamareta. El uno era funksyonaryo i el otro kantador. Un diya se enkontraron el uno en salyendo i el otro en entrando a la kamareta; lo yamo ke venga una noche para oyirlo al gazino. El amigo de oyirlo en la shena se enkanto de oyir la boz ermoza. Le disho si te puedes ir a la Evropa aya saven la valor mas muncho. Pasando tiempo empeso a lavorar en el gazino Maksim a 20 Liras. Le disho al patron 20 liras no me esta abastando kero 30 Liras. No pudyeron azer un akto. Le vino al tino las palavras ke le disho el amigo para ir a la Evropa. Se fue a Paris. Empeso a lavorar en los bares. Kon la kantika “Jezabel” empeso a konoserse. Un diya entro a la kompetisiyon de kantikas en Monte Carlo. Se izo el primer. En el orfelinato ande se ambezo el Fransez aki le aprovecho muncho para bivir en Paris. Se izo amigo kon la artista Brigitte Bardot. Travaron filmos endjuntos. Estava ganando munchas paras i estava muy repozado. Ma el era namorado de Turkiya i de Izmir. Torno a la patriya. El 1 de Disiembre1968 paso un enfraktus de meoyo en el aeropuerto Yeşilköy. I mos desho la buena vida. Ken era esta persona? El kantador era Dario Moreno i el funksyonaryo de la posta Orhan Veli. Metevos agora la kantika “Deniz ve Mehtap” i pensá a este artisto manyifiko.
