En muestras aldikeras tenemos los telefones mobiles, ke mos yevan al otro punto del mundo en un segondo. En los tyempos antiguos, las korespondensyas sureyavan mezes, agora los mesajes se estan puedyendo embiyar en un punto i kon los videos yamadas estamos puedyendo avlar kon el den frente en vyendolo.
Ansi, mos esta pasando muestro eskarinyo.
Oy todos estamos tan serka unos kon los otros komo una yamada telefonika.
Ma, mizmo ke estamos atados dijitalmente, nunka no estamos deskonektados, tanto fizikamente komo emosyonalmente.
La persona ke esta djusto a muestro lado, esta agora muy leshos komo una persona. Esta mueva ilusion de estar serka, esta trokando las relasyones de las personas.
La teknolojiya akurto las distansyas, ma de una manera ironika, esta konstruizando muros invisibles entre mozotros. La razon prinsipal de esto es ke la komunikasyon dijital no tyene profundidad. La vida dijital mos esta prezentando la konektivita, ma lo ke tenemos menester no es la konektivita, es estableser una relasyon reel kon el den frente. Este modo mos estamos perdyendo entre las relasyones sinseras.
En konkluzyon la teknolojiya, mos esta fasilitando la vida, ma no puedemos bivir ansina. La verdadera intimita, esta mas aya de las notifikasyones.
Meter los telefones a muestras aldikeras, a lo manko ke avramos muestros korasones a las personas ke tenemos en frente de mozotros, estamos destinados a ser syempre, kompletamente solos, aunke estamos konektados kon milyones de personas.
No mos olvidaremos ke, lo ke mos detyene en la vida no es el briyo del vidro del telefon, es la kayentor de una persona.
La semana pasada me asenti en un kafe para bever un kafe latte i empesi a observar mi entorno. Al lado de mi aviya una meza ande estavan asentados un grupo de kuatro amigos. El garson ya trusho le ke komandaron, desho en la meza ma dingunos no se apersivyeron. Porke, los kuatro teniyan la kavesa enklinada, los dedos enriva el telefon.
Probablamente en redes sosyales se estavan embiyando mesajes i fotos unos a los otros. Esta muy komik!...
Kompartir la mizma meza, el mizmo ayre, ma en realita dingunos de eyos estan verdaderamente ayi.
Kada uno esta bivyendo aryento su propyo mundo dijital, en su propyo ekran chiko.
Esto es egzaktamente de lo ke keriya avlar.
Agora todos estamos tan serka komo una yamada telefonika, ma a la vez tan distantes komo otro umano.
Kon los telefonos chikos ke tenemos en muestra aldikera, estamos vyendo a un amigo en “Tokyo”, lo ke esta komyendo. Estamos pensando ke las distansyas se desparesyeron i ke el mundo se enchikesyo.
Mizmo ke el mundo se enchikesyo, muestra sinseridad se reduizo tambyen.
Oy esta muy fasil embiyar un mesaj en dizyendo “komo estas”, ma pedrimos la kuriozita i la sinseridad. Ekspresamos muestra tristeza kon un emoji. Muestra komunikasyon se abolto tanto ke perdyo por kompleto su profundita. Lo mas negro es ke, mizmo ke mos estamos komunikando kon munchas personas kon un solo click, a la fin del dia mos vamos a la kama solos i sekos.
Yo penso ke, meter el telefon de boka abasho, i mirar la kara de la persona va ser mas efisiente. Porke, lo ke verdaderamente es emportante es esta vida, no es el briyo del ekran del telefon, ma es la kayentor del den frente.
