Unas kuantas semanas antes meldimos la perasha “Noah”. Komo ya savemos las perashas mos kontan leyendas de muestra istorya. Esta perasha ke se yama Noah mos konta sovre el diluvyo ke savemos.
En el tiempo de Noah, el mundo se aviya inchido de idolatriya, de ladronisyo i de immoralita. Por esto el Dio kijo kastigar al mundo entero kon un diluvyo. Ma komo Noah era una persona muy djusta, el Dio ke lo estimava muncho, kijo salvarlo a el i a toda su famiya. Le disho de fraguar una nave, i meter aryento un par de todo djenero de animales kon eyos tanbien. Sigun la leyenda el diluvyo turo munchos diyas. Noah mandava un pasharo kada semana, i el pasharo en no teniendo un lugar para pozarse, tornava pishin atras. Despues de 150 diyas, la paloma trusho una rama da azituna. Ansina Noah entendyo ke las aguas se travaron. La nave se pozo ensima del monte Ararat. Despues ke abasharon todos de la nave, fue formada una mueva jenerasyon. El Dio mando syete komandamientos ke fueron la baza de los komandamientos de Moshe Rabenu. Estos son:
-Abandonar la idolatriya
-Adulteryo sera defendido
-Rovo sera defendido
-Kontrariar al Dio sera defendido
-No matar
-No komer karne kruda
-Formar un sistem de leyes.
Djusto en la semana ke meldimos la perasha Noah, uvo una luvya dezgrasyada en Estambol. Ke koensidensya. Yo en mi vida no tengo visto una luvya semejante. Komo dizen “se avriyeron los sielos”. Ya viyamos este modo de luvyas en las televizyones i meldavamos en las gazetas, ma en payizes leshos i egzotikos. Estas luvyas mos amostran la fuersa de la natura. En unas kuantas oras las kalejas se tornaron a riyos, los otomobiles se kedaron debasho de las aguas. Munchos de estos se arezvalaron a otros lugares. Komo asta agora no uvo una luvia semejante, las kanalizasyones de Estambol no estavan sufizientes, los desaguas estavan tapados. I tanbien la sivdad entera se incho de kazas i kalejas de beton. No ay lugar para ke la tierra embeva la agua. I los urbanos ke no saven ande se fragua o ande no se fragua, para tener mas munchas parseles, serraron ensima los riyos i fraguaron kazas i sites. Siguro estos riyos eran los pumones de Estambol. Kuando no toparon sus lechos, desbordaron i se tornaron en kalamidad. Estos akontesimientos mos aze pensar komo de emportante es respektar la natura i planear las sivdades kon sensia. No devemos konsiderar komo destino las trajediyas ke se pueden prevenir.
Estambol es muestra sivdad, i protejarla es responsabilidad de todos mozotros. Las luvias deven de trayer bendisyon i fertilidad, no espanto, destruksyon i sufrimiento.
