En pasadas meldi una konseja ke me plazyo muncho i kije partajarla kon vozos. El padre le kijo dar unos kuantos konsejos antes ke se kaze el ijo. Despues ke le konto kozas importantes por el kazamyento ke iva azer, a la fin le disho, ven ijo mos iremos al mupak, aya kontinuaremos el sohbet. El ijo no saviya gizar; en chekineandose le disho al padre, muy bien. El padre metyo a la ornaya 3 kalderas de mizmo boy, las incho kon agua i asendyo la lumbre. Agora me vas a dar lo ke te va demandar de todo a dos deyos. Dame 2 karotas, 2 guevos i dos kueshkos de kafe. El ijo le diyo al padre lo ke kijo. El padre lo metyo a las kalderas uno por uno las karotas, los guevos i los kueshkos de kafe. Todos los buyo 20 minutos. Las abasho las kalderas i le disho al ijo, ven agora mos asentaremos a la meza i te kontare. El ijo kon kuriozidad grande estava perkurando de entender lo ke estava azyendo el padre. Lo metyo aryento de 3 chinis las karotas, los guevos i los kueshkos de kafe. Le disho al ijo, ke estas viendo? El ijo penso i no le puedo dar repuesta. Empeso a kontar el padre. Las karotas antes ke se buygan eran duras despues se ablandaron. Los guevos komo estavan antes de kozer se esta viendo ke estan mizmos ma agora aryento se izo duro. Los kueshkos de kafe komo lo echimos a la agua estan mizmos. No se ablandaron i no se izyeron duros. Agora te va eksplikar estos kavzos. En los kazamyentos amor i respekto son komo karne i unya. Si no ay amor, los kuples se konsumen el uno al otro i komo esta karota se amurchan. Si no ay respekto entre los kuples, los korasones se azen duro de parte a parte. Kuando ay amor tambiyen i respekto de parte a parte los kuples no se esparten i kedan lado kon lado. Le plazyo este konsejo ke le dyo el padre. Ma disho el padre la mas importante leson te va anbezar agora. Ven mos iremos al mupak de muevo. Le amostro las aguas ke estan en las kalderas. Mira le disho las aguas ande kozimos las karotas i de los guevos not tienen savor de nada. La agua de los kueshkos de kafe ke se buyo lo vazyo en un findjan i le disho beve veremos si te va plazer. Estava golyendo muy ermozo i la savor estava maraviyoza. Los kazamyentos ke son kon amor i respekto son komo esta agua de los kueshkos de kafe. Savroza i maraviyoza. No te olvides este konsejo le disho al ijo. Amor respekto i tambiyen kerensya es la baza de los kazamyentos.
