Kuando estamos suivando los haberes, estamos vyendo ke de Paris a Londra, de la İtalya a la Espanya en todos los paizes los protestos, la tansyon de las kayes, los fuegos, las matansinas, mos estamos demandando:
Ke le esta pasando al mundo? Ande se esta indo la umanidad?
Siguro ke todos los protestos no se estan azyendo por la mizma razon. Defender los derechos de las personas pasifikamente es una koza, retornar a la violensya es otra kestyon. Es importante tener prezente esta distinksyon.
En la Evropa ay munchas razones komo: la kareza de la vida, los presyos de la enerjiya, los problemes en la edukasyon, los problemes de kazas, komo estas munchas razones diferentes.
En la Fransya i en la İtalya, los protestos se estan konvirtyendo en aktos de violensya, en Espanya i en Portugal spesyalmente en los presyos de alkilar kazas las reaksyones estan salyendo a luz.
No kale olvidar ke, la kolora puede azer ke la boz de una persona sea oyida, ma la violensya priva las personas de sus derechos i de sus paz.
Yo penso ke lo ke el mundo nesesita no es mas kolora, ma mas djustisya, mas kompreansyon, mas responsabilita i la kapachita de sintirse unos kon los otros.
La umanita peryo la direksyon?
Kuando se avlava de las sivdades, mos viniya al tino los kafes, los parkos, las personas ke kaminavan en las kayes. Las personas asentadas al entorno de una meza, analizavan diferentes ideas, se sintiyan el uno kon el otro.
Siguramente ke, ni el pasado era perfekto.
Akel tyempo aviya las gerras, los konfliktos i las endjustisyas.
Ma oy, deke esta tan difisil de entendermos?
Deke una persona esta ekspresando su kolora en destruyendo kozas, magazenes en lugar de avlar?
Deke en lugar de rezolver muestros dezakordos, estamos tomando partido unos kontra otros?
Si las personas en una sosyeta se syenten inyoradas, inkomprendidas i sin esperanza del futuro, es nesesaryo de topar las razones de esto. Porke, detras de la kolora ke se manifesta en las kayes, a vezes ay problemes ke se akumulan durante muncho tyempo.
La liberta no sinyifika inyorar la liberta de los otros. Bushkar sus derechos, reklamar los propyos derechos no sinyifika tomar los derechos de los otros.
Puede ser muestra pedrida se esta produsyendo en las relasyones umanas. En vezes mos estamos olvidando de dar un saludo, de remersyar, de sintir el problem de una persona anksiyoza. Ma, lo ke yamamos sosyeta, no solo esta en pyes kon leyes i institusyones, tambyen la piedrita del respekto i del amor ke las personas demonstran unos a otros. No puedemos rezolvar todos los problemes del mundo kon un kalem.
Ensenyar a muestros ijos a topar solusyones en avlando sin kolora, sensible a la indjustisya, ma mantenerse firme delantre la violensya.
Estos pueden ser pasos chikos, ma los grandes trokamyentos sosyales, empesan kuando un individuo kestyona su propyo komportamyento.
Devemos de ambezarmos komo mos puedemos entender el uno kon el otro. Porke, la sivilizasyon no es solo los edifisyos altos, la teknolojiya avansada, i las ekonomias fuertes. La sivilizasyon, es pueder kedar komo persona mizmo kuando estas muy inyervozo, sin olvidar la djustisya al bushkar los propyos derechos, i es la kapachita de bivir endjuntos mizmo kon muestras diferensyas.
Para pueder arreglar todo en el mundo, en primero devemos de topar la pusula de la umanita. El nombre de esta pusula es: la djustisya, la konsensya i el respekto.
