Keridos i keridas, vos saludo kon grande eskarinyo. Oy en pensando para eskrivir un artikolo para el Şalom, en supito me vino al tino un sujeto ke es un poko triste malorozamente, ma kije partajarlo kon vozotros. Kreyo ke en kada paiz ay el mizmo problem, ma todos semos responsavles de muestro paiz. En Estanbol kuando era chiko, kon mi padre en vezes dia de shabat, en vezes en los moedes mos ivamos a la sinagoga. Syempre era yeno espesyalmente en Yom Kipur fina la kaleja eran yenos las sinagogas. Dospues kuando era mansevo empesi a ir solo naturalmente, syempre eran yenos las sinagogas, i munchos mansevos de mi jenerasyon viniyan a la sinagoga. Porke muestra jenerasyon era muy konektada a la sosyedad, lo ke vimos en la famiya lo aziyamos. La famiya, la komunita, la sosyedad era primera koza para mozos. Mos kazimos, vinieron los ninyos, mos izimos famiya, i aplikimos a muestros ninyos egzaktamente lo ke mos ambezimos de la famiya, las noches de shabat, los moedes, ir a la sinagoga, ma una koza reel ay ke a la jenerasyon mueva no les esta enteresando estas kozas. Kada uno kon razon muncho, esta intentando de dirijir su vida porke la situasyon mueva no esta komo antes, por esto no tyenen konfiansa en el futuro, i malorozamente se estan indo a otros paizes. I la populasyon de la sosyedad se esta azyendo vyeja, i kedimos pokos, por esto dia de Shabat las sinagogas malorozamente no estan komo antes, se kontan vaziyas. Antes en una sinagoga chika aviya 100 personas agora 30 u 40 personas si topas es bueno. Kaji kedimos en la Turkiya 13.000 personas dize ke 6000 ombres ay, 1500 son chikos. En Estambol tenemos 8-9 sinagogas ke estan avyertas un dia de Shabat en todas las sinagogas, 500-600 personas u egzisten, u no egzisten, i de otra parte unos ay ke se estan espantado de ir a la sinagoga, de la gerra ke ay. I por esto me tomo un penseryo de ande a ande vinimos. Antes saliamos del kal Apolon en Simhat Tora, kaminavamos kon los fenerikos en la kaye de Shishane, agora no keren ir a la sinagoga. Arogamos al Dio Baruhu ke no mos amarge la vida, i syempre esten yenas las sinagogas para azer orasyon al Dio. Porke las sinagogas no son solo para orasyon, tyenen unas estoryas de la vida, de la sosyedad ke bivyeron en el entorno, tyenen la kultura del Djudaizmo. Ke las puertas nunka se serren.
Kon sanedad, kon alegriya, kon pas!
