Konosesh este kuple aedado
Ke kamina siempre abrasado
Viejos, kavesas abokadas,
Espaldas enkorvadas,
Manos tremblando,
Pachas arastando
Se keren tanto bien, "mi amor" dize el, "mi kerido" responde eya. Se miran siempre en los ojos. Ay ken se burlan, ay ken se selan, todos dizen ke es una verguensa de
kaminar ansi komo dos jovenos de diziocho anyos. Kuando ve una rozika en el kamino se la aranka para eya. La vieja mujer kuando se va a empleyar va dizyendo, "a mi marido le plaze esto, a mi kerido le gusta akeyo".
El tyempo pasa ansi, ma un diya un ayre de tempesta asoplo en la maalle; al torno
del pozo las mujeres avlavan en gritando, en kada kanton de la kalejika grupos de
djente avlavan kon ravya, "No se averguensa este viejo malo de deshar a su mujer de tantos anyos; por siguro ke esta detras una mansevika." Gritos, males, enjuryas el Haham muy ensanyado yamo a los viejos a su kaza para darles doktrino. Ombre
pekador grande iva diziendo, ma aya las kozas se aklararon no es el ke esta
deshando a su mujer si no ke eya... "Sinyor Haham" fue dizyendo, "ya so muy vieja para darle mas alegriya a mi marido kerido; kero ke este orozo. Una mujer manseva le dara gozo i mizmo dainda puede tener kriaturas, no es pekado ke este kon mi dainda?"
I komo el Haham estava dainda gritando, la mujer alevanto la boz i disho, "Sinyor
Haham malgrado ke tengo respekto por ti, kero akodrarte ke kuando Lea i Rahel no
pudyeron tener kriaturas le dyeron a Yaakov a Silpa i Bilha i si me permetes de
adjustar avlaremos de muestro Davit Ameleh kuando se izo viejo su mujer Batsheva le eskojo i le dyo a el la mansevika Shulamit. Se pasa de komentaryos kreyo Sinyor Haham, la Ley muestra no dize ke mizmo si un ombre se kaza sinko vezes es la primera mujer ke tyene el merito de asentarse en sus piezes.
Nada no troko la desizyon de la vieja mujer; el Get se afırmo i topo
una guerfanika mansevika i muy prove para su marido. Le izo ashugar, la lavo i la
almisklo i se la dyo a su (Kerido). Todo el kazal vino a la boda; Hupa,velo blanko,
Sheva Berahot, kupa romper, kantes, i bendisyones. El kuple muevo se retiro en su kaza i la vieja en una kuluba oroza de aver dado gozo i alegriya.
La konseja se puede eskapar aki u si despues kuantos mezes se tomo el haber ke el
viejo se izo miftar. Dos mujeres, 10 akompanyaron al Bet Akevarot la vieja i la mueva. La vieja iva yorando i dizyendo esto kontente ke te di oras de alegriya
"Ya esto oyendo ke me vas a dizir otrun poko te aspero mi amor i yo te respondere
ya vengo kerido asentarme komo tabure a tus piezes por la eternidad.
Amor Amor grande es tu fuersa i tu dolor.
