Antes dos semanas tuve la okazyon de azer un viyaje kon un grupo de amigos muy sempatikos i armonyozos.
Mos fuimos a Bilbao ke se topa en la rejyon del
Paiz Basko (Bask bölgesi). El tyempo muy ermozo para kaminar i konoser la sivdad. Munchos turistos ke vinyeron de las kuatro partes del mundo para vijitar el
Muzeo Guggenheim, un muzeo moderno ke es muy konosido i famozo en el mundo entero.
Una struktura muy diferente, echo de plakas de titanyum, superfisyas de vidro i esta kuvyerto por afuera de pyedra de kirech. Su interyor esta kuvyerto de asero.
Este muzeo se topa en el sentro de la sivdad, al bodre del rio Nervion.
Frank Gehry en el anyo 1997 konstruizo este muzeo ke sureyo kuatro anyos. El punto fokal es el arte kontamporano del siglo vente.
Kuando se avyo, se asperava 600.000 visitores kada anyo, ma esto pujo de dia en dia. En el anyo 2007, dyez milyones de turistos vijitaron este muzeo ke es una rikeza kultural para Bilbao i por la rejyon del norte de la Espanya, tambyen tyene un efekto grande por la ekonomiya del paiz.
Lo ke me plazyo lo mas muncho es ke aviya una sala de Espejos Infinitos echo por una artista famoza japonesa, Yayoi Kusama. Eya fue konosida por el mundo entero kon este konsepto veramente enteresante. Kuando entri a la kamareta yeno de luzes de kolores, me vide kon una infinita a kavza de los espejos.
A la entrada del muzeo vimos la statua jiganteska de Tiralanya ke tyene dyez metros de altor.
El senso: El eskultor, Louise Bourgeois izo esta ovra de arte ke se yama Mama i la dediko a su madre tejedora. La tiralanya a vezes es protektora, kreativa i tejedora de redes, i en mizmo tyempo aferrando a su presa (av) kon su karakter fuerte semboliza la fortaleza i la frajilita de la maternita.
A la salida del muzeo, estamos vyendo un perro kuvyerto de flores diferentes i multikolores echo por
Jeff Koons. La statua de perro ke se yama Puppy es formada de miles de rozas. Tyene 12 metros de altor. Es un perro guardiyan del muzeo. Kada dia el aspera kon pasensya en la puerta de kultura ke vengan i ke se fotografien delantre de el.
En Bilbao, ay lugares de observasyon por ver la vista de la sivdad. El sentro, las eglisyas i las katedrales…
Las strukturas arkitektonikas, i las playas son enteresantes. La struktura de la arena varia asigun el oseano, de fina arena de kolor amariya dorada, a arenas volkanikas pretas i prezenta diversita asta las zonas
rokozas.
La kultura de komer es bazada en los produktos de mar freskos, i mondialmente famozos, komo los Pinchos ke se azen enriva de revanadas delgadas de pan, varios tipos para komer. Por egzempyo: Enriva de la revanada de pan se puede meter avokado i un pedaso de guevo, un kezo i un poko de marmelada u byen, enriva del pan gambas, kalamares, peshkados salados, tipos de kezos kon tomat i prishil i munchas otras kombinasyones.
Ay munchos vinos savrozos, blanko, korolado u roze.
El komer en Bilbao es una kultura. Los pinchos se komen en pyes. Entras a un bar, tomas una bevyenda, komes un pincho i sales de aya. Entras a otro bar i azes la mizma koza. Esto es el ritmo de Bilbao.
Bilbao no esta kompetiendo kon Barcelona ni Madrid. No es una sivdad ermoza komo St. Sebastian. Lo ke poseda es la orijinalidad.
