Paul Frederic Simon nasyo el 13 de Oktubre de 1941 en Newark Heights, Nuevo Jersey. Poko despues se mudo a Queens, Nueva York, ande empeso su karyera muzikal en la eskola segundaria. Aya konosyo a Art Garfunkel, i djuntos empesaron a kantar. En 1957 anrejistraron sus primer single, "Hey, Schoolgirl", kon Big Records; este single suvyo pishin a la 49ema lugar del “pop list successes”.
Simon estudyo i se diplomo en Queens College. Aya se izo myembro de la fraternidad Alpha Epsilon Pi. Entre 1957 i 1964, Simon kompozo, anrejistro mas de trenta kantikas, adjuntandose okazyonalmente kon Garfunkel (ke estava estudyando en la Universidad de Columbia en Manhattan). Ma, estos albumes se publikaron ande studios diskografikos minores, komo Amy Records. Simon tambyen empleyo varios pseudonimos para estas gravasyones, inkluyendo Tico, komo parte del grupo “Tico and the Triumphs”. Fue tambyen durante esta epoka kuando Simon konosyo a Carole King, kon ken enrejistro syertas kantikas komo duo kon el nombre “The Cosines”. Simon tambyen empeso a produsir munchas melodiyas para otras bandas, komo The Vels i The Pedestrians.
Al empesijo de 1964, Simon i Garfunkel se adjuntaron kon sus propyos nombres, reusheron una odisyon en Columbia Records i firmaron un kontrato. Sus primer disko, “Wednesday Morning, 3 A.M.”, se publiko el 19 de Oktobre de 1964. Aunke el album no era inisyalmente una reushita, munchas stasyones de radio empesaron a resivir demandas para ke pasen "The Sound of Silence". La kantika se izo numero uno en las listas de kantikas en los Estados Unidos. En 1965, despues del fiasko de Wednesday Morning, 3 A.M., Simon, solo el, se fue a Inglaterra para anrejistrar un album: The Paul Simon Song Book. Despues de la reushita de "The Sound of Silence", Simon torno a los Estados Unidos para adjuntarse kon Garfunkel. Djuntos anrejistraron munchos albumes, entre eyos Parsley, Sage, Rosemary and Thyme (1966) i Bridge over Troubled Water (1970). Simon i Garfunkel tambyen kontribuyeron ekskluzivamente a la banda sonora del filmo “The Graduate” (1967).
Despues del lansamyento de Bridge over Troubled Water, Simon empeso a dedikarse a proyektos en solitaryo, sin Garfunkel o otros. En 1972, publiko Paul Simon, i en 1973, There Goes Rhymin' Simon, ke inkluiya "Something So Right" i "Kodachrome". Su album de 1975, Still Crazy After All These Years, es konsiderado komo uno de sus mijores lavoros. En 1986, Simon gano un Grammy por su album Graceland. En 2002, anrejistro el tema muzikal prinsipal de "Father and Daughter", para el filmo animado infantil The Wild Thornberrys Movie. La kantika fue nominada al Oscar a la Mijor Kantika Orijinal.
En 1975, Simon i Garfunkel se reunyeron para sus “top ten single”, "My Little Town". En 1981, el duo se reunyo para el famozo konserto en Central Park, Nueva York, i este mizmo anyo lansaron el album de reunyon "Hearts and Bones".
En 1990, Simon i Garfunkel entraron al Salon de la Fama del Rock and Roll. En 2000, Simon fue inkluyido de muevo en el Salon de la Fama del Rock and Roll por su karyera solo. En 2003, de muevo se adjuntaron para resivir el Premio Grammy a la Trayektoria Artistika. Esta reunyon dyo lugar a una turne en los Estados Unidos, segida de una turne enternasyonal en 2004, ke kulmino kon un konser debaldes en el Koliseo de Roma.
