Kada jenerasyon es el produkto de su epoka. El mundo ande bivieron muestros padres i abuelos, kuando eran mansevos era muncho mas diferente del mundo ande kresen los mansevos de oy. No son solo las vistimyentas, la muzika i los aparatos ke trokaron, trokaron tambien i las kostumbres, las ideas, las esperansas i la manera de mirar la vida.
Antes, la djente eskriviya letras i kartas i asperava diyas enteros para resivir novedades de sus keridos. Las vijitas i los randevus se organizavan de antes, las mezas eran yenas de konversasyones. Las relasyones kon los vizinos eran mas fuertes, la djente se alegrava de batir la puerta del vizino, de partajar un plato de komida. Se respektavan las palavras de los grandes i se dava muncha importansia a las tradisyones i a la famiya.
Oy puedemos avlar en unos kuantos segundos kon una persona ke se topa en la otra punta del mundo. Los mansevos topan informasyones fasilmente, forman amistades en las redes sosyales i se avlan de diferentes maneras. Ma asta los ke biven en la mizma kaza pueden kedar estranjeros a los mundos unos de otros.
Los grandes se keshan ke los mansevos no tienen pasensya komo antes i ke no dan bastante importansia a las tradisyones. Los mansevos, por sus partes pensan ke los grandes no los entienden i ke no pueden adaptar sus ideas al mundo de agora. Ansina kada parte defende su propio punto de vista i la distansya entre eyos se va engrandesyendo.
Ma el verdadero problem no es ke las djenerasyones tienen ideas diferentes. El verdadero problem es kuando deshan de partajar el esfuerso de entendersen unos a los otros.
Kada epoka tiene sus propia difikultades. Los ke bivieron en el pasado pasaron gerras, provedad, difikultades ekonomikas i diferentes presiones sosialas. Los mansevos de oy biven kon la kompetensia, la ansia del avenir, la presion de las redes sosyalas i los problemes de una vida ke troka sin deskanso. En lugar de komparar las difikultades de unos kon las de otros, no seriya mijor de entender las kondisyones de kada epoka?
Los grandes pueden transmeter a los mansevos sus eksperiensas ke tienen una grande valor. La pasensya, el lavoro, la solidaridad i el saver apresiyar las chikas ermozuras de la vida. Los mansevos tanbien pueden ofreser a los grandes, las muevas ideas, la mueva teknolojiya, i diferentes puntos de vista para entender mijor el mundo de oy.
Por esto entre las jenerasyones no deve aver un konkurso sino un “inter”-kambio. Los grandes no tienen de konservar todas las kostumbres del pasado, i los mansevos no deven de pensar ke todo lo ke viene del pasado no tiene valor. Kuando un inyeto oye las memoryas de su abuela, kuando un abuelo se ambeza de su inyeto a empleyar el telefon, o kuando todos se asentan kon amor en la mizma meza, mizmo teniendo ideas diferentes, se forman los pontes verdaderos entre las jenerasyones.
No mos olvidaremos la kantika de Orson Wells: Yo ya se lo ke es la manseves, ma tu no saves lo ke es la vejes. Lo importante es el respekto de unos a los otros.
