Keridos lektores. Antes dos semanas tuve okazyon de pasar las fiestas, Rosh Ashana i Kipur en Inglaterra kon mi ija i su famiya. Eyos biven serka de Bristol en un kazal. No es muy leshos de la sivdad. Ama es muncho mas aryento de la natura. Todo ke ves es vedre. Arvoles de mansanas se pueden ver a lo largo de los kaminos. Las kreaturas se van a sus eskolas kon sus bisikletas o skooters de los kaminikos, fasilmente, kon repozo. Me esta plazyendo muncho. Porke kuando sales a la kaye es komo ke estas biviendo en la Izla de Prinkipo.
Me plaze muncho ir a kaminar aryento de las sharas de esta sivdad. En una de estos, Leigh Woods aviya diferentes direksiyones de kaminar. Una de estas era mas muncho para los elevos ke vienen kon sus eskolas, para ambezar la natura. Kada syen metros aviya pankartas ke estavan dando detalyos de los arvoles, komo i kuando kale kortarlos, komo se protejan los animales ke biven en esta naturaleza. Esta edukasyon esta parvinyendo a dar konsensya a los mansevos ke no estamos bivyendo aparte de la natura. Semos atados uno al otro. Esta dando apersivimiento de la kolor, de la golor, de la boz, de la shara. Afilu i de tu puerpo. En una pankarta mos dize: “si te estas yelando no te preokupes, la shara te ayuda.” I te esta esplikando komo lo vas a azer. “Toma el reflo de la shara aryento, detenelo un poko i da tu reflo afuera a poko a poko. El ayre de afuera kon tu reflo, aryento de un poko tiempo se van a balansar. Despues no te vas a yelar.”
Protejar estas sharas es una politika del governo. Estas sharas son donasyones al governo o el governo esta merkando de las famiyas viejas. Para ke no se ancheyan las sivdades i ke se proteje la natura i la istorya de la sivdad. Por este kavzo ay kazas de 200 o 400 anyos estan dayinda bien miradas.
Viajar es avrir tu mirada a lo mas klaro. Ay de kontar munchas kozas.
