Keridos Lektores,
Ya pasimos las fyestas Rosh-Ashana, Kipur i Sukot kon grande alegriya.
La fyesta de Sukot, es una fyesta djudiya del otonyo ke sureya una semana durante el mez de “Tishri” entre septiembre i oktubre del kalendaryo gregoryano.
Los djudyos bivyeron kuarenta anyos en el dizierto i desharon atras el esklavaje.
Endjuntos kon las fyestas “Pesah i Shavuot”, la fyesta de “Sukot” es una de las festividades mas importantes del djudaizmo. Komo fyesta agrikola, el sukot se selebrava komo un dia de aksyon de grasyas por las rekoltas del otonyo i de forma mas jeneral, por los regalos de la natura durante el anyo entero.
“LA SUKA”: La Tora ordena a los djudyos ke deshen sus kazas por una semana i ke se arrekojgan en la suka. De jenerasyon en jenerasyon se selebra kada anyo esta fyesta de syete dias konsakrada al Senyor.
Kale bivir esta semana en la suka.
Los nasidos en Israel deven de bivir en la suka, para ke sus desendientes sepan ke el “Senyor, el Dyo el todo poderozo” izo bivir en las sukas a los israelitas kuando los izo salir de Ejipto.
Despues, los djudyos konstruizaron una kuliba en el balkon de sus kazas para ke sea konvenivle para komer i durmir. Esta kuliba deviya de konstruirse solamente kon elementos naturales. Ay i kulibas publikas.
La tradisyon es invitar amigos i famiya i pasar el tyempo endjuntos, englenearsen en esta fyesta, i la suka semboliza la fuersa i la unyon i esto ofrese la ospitalidad.
En Sukot la bindisyon de los kuatro vejetales es muy importante. Los kuatro vejetales son: el “lulav”, el “etrog”, el “adas” i la “arava”.
Kuando se dize otonyo, mos vyene al tino la kolor amariya i las ojas ke kayen de los arvoles.
Los tyempos kayentes del enverano ya empesan a terminarsen. Las noches mas freskas, i las personas kon una jaketa i no kon mangas kurtas, las luvyas empesan.
Despues de la luvya la golor maraviyoza de la tyerra ke absorba la agua de la luvya en todo modo de lugar.
Los arvoles i las rozas golen al miskle.
Septiembre es la sezon de movimyentos. Se ve una preparasyon, una enerjiya en todo modo de lugar.
Septiembre es la sezon de la resureksyon i de las emosyones diferentes.
El otonyo es el tyempo ke la vedrura de la natura empesa a poko a poko a devenir amariya. Es el tyempo de la tristeza, del amor i de la separasyon. La fin de unas vakansas de tres mezes. Espertar temprano para ir a la eskola, al echo, preparasyones para invyerno ke va pasar yelado.
Spesyalmente la natura troka, los tyempos mas yelados,
Tornar de las izlas…
Los dias se akurtesen, las noches se alargan, el sol se esparese mas presto, da mas poko luz i kayenta mas poko. En mizmo tyempo el otonyo es la sezon de las hazinuras.
Kale azer atansyon para no hazinearmos.
Invyernada buena kon salud i kon felisidad, sin gerras i kon evenementos alegres.
