La Monarshiya de Moritanya fue el dalkavo paiz a abandonar su rejim de esklavaje en1980. Munchos otros paizes kon leyes i kondisyones diferentes, miraron a kontinuar de deshar bivo el esklavaje, sigun las nuvelas ke se oyen. Milyones se topan sovretodo en los paizes de la Afrika, ande ay karavanas de esklavos ke los mandan de un lugar al otro para ser vendidos en los merkados publikos. Estos eskritos son la baza del sujeto del esklavaje en jeneral, una mancha de la salvejeria de la umanidad.
Oy avlaremos de una regla ke tyene lugar importante en el Judaizmo: El Pidyon Shevuyim. Ke mos dize esta Ley?
Para liberar un Judyo ke esta en prezo, u bien ke esta lavorando en echos pezgados ke son leshos de umanidad, se dava un monton de kozas, presios para salvar un ermano Judyo de la salvajeria de un patron inimigo de Judyos.
En el tyempo ke Israel biviya en su tierra, para salvar un Judyo kaliya entrar en gerra kontra el inimigo, komo Avraam ke para salvar su sovrino Lot, entro en gerra kontra los ke yamavan los chikos Reyes. Despues ke se derroko el Bet Amikdash, los problemes de los Judyos del galut pujaron. En jeneral los esklavos estavan matados o vendidos en los markos por toda sus vidas.
A poko a poko este esklavaje de los Judyos peryo su identidad, su kreensya, i mizmo su vida. La komunidad Judiya ampeso a arekojer munchas paras por salvar sus ermanos. La operasyon de salvasion ampeso ansi:
Kuando una nave se aserkava de un Porto, los Judyos de la komunidad de este paiz, arekojiyan munchas paras i tratavan kon los patrones para merkar lo mas posivle de esklavos, ma un muevo problem aparesyo. Los patrones de esklavos ke topan de este merkado un revenido fasil pujaron de diya en diya el presio de esta vendida.
El Rabi Moshe Ben Maymon mando un avizo spesial a los Judyos de Mistrayim i de Erets Israel, ke arebivan, i ke aktiven la salvasyon de los siervos Judyos de Bilbis, una sivdad de Mistrayim. En esta sivdad en el ampesijo del 12en siglo los Kristianos teniyan munchos esklavos Judyos. Para salvarlos mandaron 2 mesajeros; el uno era Aaron Halevi, i un ombre ke se yamava Pamas.
En Los dalkavos anyos se topo un kontrato del 13en siglo, ande se ve ke una mujer non Judiya ke salvo a una madre i dos ijos, de las manos de los Romanos ke los teniyan en esklavaje, kon un presio muy alto.
Para salvar muestros ermanos de los inimigos, estamos prontos a azer todo modo de sakrifisyo.
El Dyo ke este kon mozotros.
