Durante munchos anyos, esta seria komika ke saliya en las pajinas de la gazeta Hürriyet kon el nombre de “Güngörmüşler”, no era para mozotros solo una diversion; ma era una parte inseparavle de la vida de kada dia, una de akeyas kozas ke le dava savor a muestra vida. El nombre orijinal de la seria era Bringing Up Father, ma entre mozotros los konosimos komo Shaban i Tonton. Jiggs se izo Shaban, Maggie se izo Tonton, i su ija Nora, Leyla. Estos nombres kedaron tanto en muestra memoria ke, mezmo ke pasaron munchos anyos, kuando pensamos a estos personajes, mos akodramos mezmo sus karakteres.
Güngörmüşler saliya en las pajinas interiores de la gazeta. Despues, kuando salio el suplemento de la fin de semana, Kelebek, se izo una de las partes la mas kerida de Kelebek. Mozotros, las kreaturas, munchas vezes ni miravamos a los haberes de la gazeta: de vista tomavamos el suplemento Kelebek i bushkavamos akeya seria alegre.
En el mizmo lugar avia tambien otros amigos ke mos eran keridos, komo Bizimkiler, Fatoş i Dedektif Nik. Ma los pantalones de Shaban ke se le kayiyan, el dezeo de Tonton de amostrar su importansia, o las maneras finas de Leyla, kada vez mos azian riir.
La esensia de la seria era burlarse de la alta sosieda i de sus dezeo de pareser importante i elegante, i amostrarlo a la djente.
Shaban, mezmo ke keria, no podia deshar sus viejos kostumbres. Tonton, de la otra parte, keria entrar a la buena sosieda, asentarse en mezas de envitasion i amostrarse komo una senyora. Entre los dos, siempre salia un pleto. De estos pletos nasian las situasiones las mas komikas i las rizas las mas grandes.
Mozotros los konosiamos komo una famiya ke estava siempre peleando, ma en realidad nunka deshavan de estar endjuntos. A la fin i al kavo, la famiya era la famiya.
En kada epizodio saliya de una manera muy konosida este pleto entre los dos por los viejos kostumbres ke Shaban no puede deshar i el dezeo de Tonton de ampesar una vida mueva. I esto mos paresia muy familiar.
Porke, de una parte, Güngörmüşler mos amostrava famiyas ke kerian krear una vida mueva en sus apartamentos; ma, de otra parte, mos amostrava la djente ke konservava la vida del barrio, los kostumbres de antes i las relasiones entre vizinos.
Detras de todo akel umor avia, en realidad, un espejo chiko de muestra propria vida, de muestra propria sosiedad.
Las aventuras de Shaban, ke kada vez se kayia i se alevantava, las egzajerasiones de Tonton, los chizmes de los vizinos, las mezas de las envitasiones, kon toda su grandeza... Todo esto, esta dainda en muestra memoria.
En las demanyanas, durante el dezayuno, avriamos la gazeta i sintiamos akeya golor tan espesial de la tinta, meldavamos Güngörmüşler. Era una kozika chika, ma mos dava una alegria ke no se puede olvidar.
Oy, kuando miramos atras, entendemos ke Güngörmüşler no era solo una seria komika. Era un kostumbre kerido, una parte de muestra chikes i de muestra memoria komun.
Shaban, kon su manera inosente, Tonton, kon sus ambisiones, i Leyla, kon su elegansia, kedaron guadrados en muestra memoria. I, duspues de tantos anyos, estan aya, bivos.
