Rabi Yaakov Kranz kontava istoryas en la sivdad de Duvna de Rusiya. Era una persona muy intelijente.
Un diya le demandaron una demanda: Deke selebramos Simhat Tora despues de Sukot? Ya tomaron los Bnei Israel la Tora en Shavuot, deke asperaron a selebrar i alegrarsen i baylar despues de tantos mezes?
Komo siempre Rabi Yaakov les respondyo kon una semejansa.
En un payiz biviyan un rey i una reyna. Eran muy orozos i biviyan en abundansya. Teniyan solo una nuve preta ensima de eyos, ke no teniyan kriyaturas. El rey i la reyna no supieron kualo azer, se fueron a los doktores de el mundo entero, vijitaron todo modo de majisyenes, endivinas i brushas. Ma nada no sirviyo.
Despues de unos kuantos anyos, el rey i la reyna tomaron haber ke en una grota leshana bive una muy famoza ichizera. Se fueron i ande eya. La ichizera los bendisho i les disho: Vash a tener una ija muy muy ermoza, entelijente i va tener una personalidad maraviyoza. Ma esto todo kon una sola kondisyon. Asta el diya ke se va kazar, dingun ombre no la va ver. Mizmo el padre no deve de verla. Si en kavzo ke un ombre la ve asta el diya de su boda, se va murir.
Kon grande emosyon tornaron a sus palasyos. I en verdad la reyna kedo prenyada despues de un kurto tiempo. El syeten mez de su prenyado, la reyna se instalo en una izla dizierta.
La ijika ke nasyo estava muy ermozika. I kada anyo ke pasava la entelijensya i la buendad impresyonava la djente.
Kuando vino el tiempo de kazar de la prensesa, el padre ampeso a bushkar un prens ke iva ser dinyo de su ija. Dingunos no keriyan akseptar el oferto del rey porke dingunos no keriyan kazarse kon una mujer ke no vieron. Todos estavan refuzando. Solo un prens aksepto. Se penso: Viene de una buena famiya, el padre es un rey famozo i onesto, ok ya esto pronto para kazarme kon la prensesa.
Despues de la boda la novya se kito el velo de su kara i el novyo la vido por la primera vez. El prens se empresyono muncho de ver la ermozura ma teniya un dudo. Sera de verdad una mujer muy spesyala, komo me konto su padre el rey? Vamos a ver kon tiempo. Ken save?
Ma despues de unos kuantos mezes el prens se estava maraviyando de su ermozura, entelijensya i su karakter. Se fue ande el rey para remersyarlo ke le propozo a kazarse kon su ija.
Esto es la konseja ke konto el Rabi de Dubna. “Tomimos la Tora en Shavuot ma no saviyamos lo ke aviya aryento. Dimos palavra ke vamos a akseptar todo lo ke estava eskrito. Ma agora en Simhat Tora, despues de unos kuantos mezes, mos rendimos kuento del regalo maraviyozo ke tomimos del Dio. Vino el tiempo ke mos alegremos i ampesimos a baylar kon la Tora”.
