Eliza Davis nasyo en el anyo 1817, ija de una famiya Judiya. En 1835 eya se kazo kon su primo, el Banker, James Pinhas Deyvis. En el anyo 1860 el merko una kaza en Londra de la mano del eskrivano Charles Dickens. Esta merkansia fue la primera okazion para el eskrivano de konoser de serka un Judyo. Mas tadre el eskrivyo, ke malgrado lo ke se diziya sovre los Judyos, era muy agreavle de tener relasiones de echos kon eyos.
Kuando Eliza meldo el livro de Dickens, Oliver Twist, se sintyo revoltada de este eskrito tan konosido, ke deskriviya la persona sovre Fajin ke era el shefe de los ladrones Judyos. Eliza eskrivyo al eskrivano tan konosido, ke pena para los ke sufren en el payiz, en avlando de una manera tan negativa sovre los Judyos. Kale ke demande ekskuzas para su injustisya sovre los Judyos, i pardon por sus palavras negativas, kale tanbien ke endereche el deskorajamiento enverso los Judyos. (Ke aga Kapara).
En su letra de repuesta Dickens aze remarka, ke en el eskrito tanbien aviya sus ideas negativas sovre los Kristyanos.
Despues de un anyo, Dickens eskrivyo un Livro ande el personaje prinsipal era Riah, un Judyo aedado, ke metyo su vida en perikolo para salvar dos ijikas Kristianas muy proves. A la fin del livro el Sinyor Riah aze un diskorso dizyendo: En kual puevlo no se topa djente negra?
En 1866 Dickens publiko un artikolo ande avla de los Judyos en termos buenos, ke se lavan las manos i dan onor a todo modo de Mitzvotes. Eliza le manda un regalo, i le eskrive una letra ke estava atada al regalo. Dickens le responde kon biervos de alavasiones al puevlo Judyo, ke el sueta siempre es kavod de todos, adjustando ke los Judyos ke no tengan dingun mal, i repetando ke respekta este puevlo i ke no tenga ni mal ni danyo.
Esperando Pas i Amor entre todos, vos digo Hag Sameah, Rosh Ashana alegre; al vermos keridos!
