Kada jenerasyon dize ke se esta trokando el modo de bivir. Ya es verdad. Ken toma unos anyos, no kije dizir kuando se enviejesen, dizen en muestro tiempo era otra koza. Aviya vizindad, aviya amistad, aviya respekto. No se kompara kon el diya de oy. No vash a kreyer ma las ijas miyas ke son dainda mansevas, tambiyen eyas kuando avlamos de este modo de kestyon i eyas dizen antes era otro. Es verdad ke se esta trokando la vida. En los anyos de la Pandemia, los Astrologos estavan kontando en la televizyon kaji kada diya ke la vida se va trokar i no vos vash a pueder pensar komo ke se va trokar. En los mezes del empesijo de la pandemiya empesaron a trokarse los lavoros. Sin irmos al Buro empesimos a lavorar de kaza en la komputadora. Dinguna koza no manko i no kedo atras de nada del echo ke aziyamos. En lavorando de kaza no mos estavamos vistiyendo muy ofisial. No era komo ir kada diya al Buro. En vezes no mos arapavamos. No se viya muncho kuando aziyamos una reunion o konversasyon. En vezes mos vistiyamos kamiza ma debasho estavamos kon eshofman o kon Pijama. Kuando vino el mez de Pesah empesimos a pensar komo vamos azer el seder. Porke dengunos no keriyan salir o toparsen kon djentorya. Izimos seder kada famiya solos i aresekados. Mos telefonavan las ijas o los ijos kon vista del telefon. Kuando paso 10 mezes o un anyo de ensima empesimos a salir a las kayes avagar avagar ma los presyos del merkado o del bazar estavan koryendo presto presto por ariva. Antes mos topavamos en las kazas kon los amigos; despues de la pandemiya empesimos arokojermos en kafes. Ya estava salyendo lo ke disheron los Astrologos. Ya se estava trokando la vida. Malorozamente i el rituel ke teniyamos de ir al kal los Shabates se fue por abasho de boka abasho. Kuando peryeron el uzo, es muy difisil para las personas de vinir en si. Este anyo vide ni en Kipur no estavan yenos los kales. Antes de la pandemiya me akodro mos ivamos al kal en los muedes; mos vistiyamos koleto i kravata. Kreyevos este anyo en el kal entero no aviya ni 30 personas ke se estavan vistidos asi. Se troko komo todo i esta moda, despues de la pandemiya. Si dizish los echos se izyeron embatakados. Por esto empesaron a kitar lavorantes, ken no pudo rezistir, serraron las botikas. Los mansevos kazados ke tienen kreyaturas chikas uno por uno empesaron a irsen a otros paizes. Porke alkansar a los presyos de las eskolas no esta kolay. Las famiyas una por una empesaron a dispersarsen. El mundo esta gerreyando, vinimos al bodre de la tresera gerra mondial. Ven agora no te kreyas a las palavras de los Astrologos ke disheron en el tiempo de la pandemiya.
