En medio del tumulto de Estanbol, ay lugares ande la persona se puede sintir en un otro mundo. La guerta de Machka, Tashlık era uno de estos lugares espesyales.
En el korason de la sivdad, eskondido entre las verduras, este ermozo lugar dava a la persona una sensasion de pas, kon su atmosfera nostaljika. Tashlık era uno de los lugares de enkontro el mas importante de la vida sosyal de Estanbol en la segunda mitad del venten siglo, ke kedo en la memorya de munchas jenerasiones.
El lugar fue planeado en 1948 por el famozo arkitekto Sedad Hakkı Eldem. Se topava en la rejion de Machka-Tashlık, en una kolina trankila, entre arvoles i naturaleza vedre. En 1988 fue derrokado, i en el mizmo lugar, fue fraguado el Swissôtel.
Taşlık teniya un aire puro i una vista maraviyoza. El kamino era un poko en suvida ma valiya la pena suvirlo. Porke kuando se arivava ariva, el bruido de Estanbol kedava atras i se avriya delantre un mundo kompletamente diferente.
Mezas debasho de los arvoles, una briza tivya ke viniya de la mar, las bozes de los pasharikos i las kupas de te, finos i kon su sonido delikado...
Eran diyas kuando el te no aviya entrado en bolsikas; el te era verdadmente te.
Tashlık, en medyo de la naturaleza vedre de Machka, no era solo un lugar para bever te. Era un lugar ande se enkontravan los rekuerdos, las konversasiones, las amistades i los ermozos enkuentros.
La persona ke se asentava aki se aleshava del bruido de Estanbol i sintiya ke el tiempo iva un poko mas avagar.
A vezes se avlava, a vezes se oiyan rizas, i a vezes uno admirava Estanbol sin dizir nada.
El Gazino de Tashlık era uno de los lugares importantes de la kultura de los muzikholes de akel tyempo. El patron del gazino era Fahrettin Arslan, uno de los empresaryos mas konosidos de akel tyempo.
La parte del gazino estava un poko mas adelantre de la guerta. Durante las matines i los espektakolos de la noche, las bozes de los artistos viniyan asta los ke estavan asentados en la guerta.
Los ke viníyan al Tashlık no eran solo madres, kreaturas i famiyas. Aviya tambien grandes grupos de mansevos ke eran abituados a este lugar.
En partikular kuando viniya la primavera, Tashlık era yeno de estudiantes. Para los estudiantes ke saliyan del sinema, Tashlık era el mas importante lugar para enkontrarsen, avlar, deskansar un poko i pasar tiempo endjuntos.
Kuando viniya la primavera, se metiyan muevas mezas en la guerta. En una meza se asentavan sinko o sesh personas; en otra grupos de kinze o vente estudiantes.
Las konversasiones se alargavan, las rizas se mesklavan unas kon otras i dingunos no entendiya komo pasava el tyempo.
La savor de un findjan de te bevido aki era verdadmente diferente.
En Estanbol, mezmo ke muevos edifisyos se estava fraguando en kada kanton, aviya lugares ke guadravan la alma del pasado.
Tashlık era partikular porke no teniya grandes pretansyones.
Una meza, unas kuantas siyas, un te i una buena konversasion…
A vezes, lo ke yamamos felisidad es reelmente tan simple komo esto.
