En la vida de la persona le afitan kozas ke, mezmo ke pasan anyos, no se pueden olvidar. Una palavra, una mirada, una indjustisia, una separasion u un chiko komporto ke mos rompyo el korason, kontinua a bivir en muestra memoria. Kon tiempo, las personas trokan, la vida los yeva por otros kaminyos; ma akeya dolor puede tornar a apareser en un momento ke no mos aspersivimos.
Esto es tambien lo enteresante en la mirada de Dostoyevski sovre la alma umana. La persona no es solo una kreatura ke se akodra lo ke le paso. A vezes kere akodrarse spesialmente la dolor ke le izo porke la dolor le aze pensar ke esta biviendo, ke sintio, i ke no deve olvidar lo ke le izieron en el pasado.
Las kozas buenas, en trokando, pueden efasarsen de muestra memorya mas presto. Una buendad ke mos izyeron, un diya ermozo ke pasimos, kon tiempo puede pareser ordinaryo. Ma una negra palavra, estar dezrepozado, sintir komo si mos traizaron, o sufrir una indjustisya, keda mas muncho tiempo en muestra mente.
La razon de esto puede ser ke la persona tiene una memorya ke la proteja. Akodrarse de una negra eksperiensa es komo una prekosyon tomada para no bivir la mizma dolor otruna vez. La persona se dize de si para si: “No te olvides de esto; no agas el mizmo yerro otra vez.” Ansina, la dolor del pasado torna a una defensa kontra el futuro.
Ma ay tambien un otro lado a esto.
A vezes la persona no kere deshar su dolor. Porke si desha su dolor, se olvida la indjustisya ke le izyeron. Pensa otruna vez lo ke bivyo. Torna a bivir la mizma koza en su mente, se akodra de muevo de las palavras ke fueron dichas i se demanda: “Deke paso ansina?” Lo ke afito kedo en el pasado, ma la persona kontinua mantenyendolo bivo en su mente.
Ansina, la dolor ke se bivyo en el pasado se aze una parte del diya de oy.
Una de las mas grandes kontradiksiones del ser umano es esto: kere liberarse de la dolor, ma no kere desharla del todo.
Ma akodrarse del pasado i bivir en el pasado no son la mizma koza.
Puedemos guadrar lo ke mos ambezimos de eyos. Ma no es menester tornar a bivir la dolor kada diya. Dar permision a la persona del pasado de governar muestro prezente es bivir la dolor kada vez. La verdadera libertad no es olvidar; es no yevar mas la mizma dolor, mizmo ke mos estamos akodrando.
La persona no puede efasar su pasado. Ma puede trokar el lugar ke el pasado tiene en su vida. Lo ke una vez era una ferida, puede kon tiempo, tornar a una leson. El insidente ke una vez mos izo yorar puede ensenyarmos a entender mijor a las personas i la vida.
Esta es la mas ermoza manera de akodrarse: liberarse del negro insidente sin olvidarlo, i akodrarse de lo bueno kon su valor, sin deshar ke pase i se piedra.
