A vezes la persona no kere munchas kozas de la vida, un telefon, un mesaje, una soneriya de la puerta, u bien una fraza kurta ke dize: “Pensi a ti”…
Espesyalmente si paso mizmo munchos anyos, saver ke unos se akodran de ti, desha una kayentor indeskribtivle en el korason. Porke ser akodrado, en realita sinyifika, “Deshates una trasa en mi vida”.
En el mundo aktual, todo esta trokando rapidamente. Las personas estan entrando i salyendo de la vida, los telefones se estan inchendo de syenes de nombres, ma a vezes no estamos topando tyempo para oyir las bozes de muestros keridos. Mos estamos akodrando, los dias de nasimyento, estamos embiyando un mesaje en unos kuantos puntos, i despues estamos kontinuando muestra vida.
En realita, akodrarse de verdad no es solo dizir: “Feliz kumpleanyos”. No olvidar una palavra ke mos disho un aliado antes anyos, akodrarse de un amigo vyejo kuando oyiyamos una kantika ke le plaziya, pensar a el, akodrar la savor de un kafe ke aviyamos bevido endjuntos, prezervar el lugar de una persona en muestras vidas mizmo ke paso muncho tyempo. Una persona kon ken lavorates en el mizmo lugar antes anyos te bushka kon telefon i te dize: “Me akodri de ti, komo estas?”.
Un amigo de tu chikes despues de anyos sale enfrente de ti. Un vizino vyejo te konta un rekuerdo del pasado u un mansevo ke le ayudates alguna vez, ke te rankontra munchos anyos mas tadre: “Nunka no me olvidi de lo ke me dishites”. Akel tyempo entendemos ke: Una persona egziste no solo a traverso de los anyos ke bivyo, sino tambyen a traverso de las trasas ke desho en los rekuerdos de los otros.
La valor de ser akodrado se entyende mijor kuando la persona se enviejese. Porke, al mirar atras, uno empesa a pensar mas en lo ke el partajo ke en lo ke poseda.
Dingunos de eyos no tyenen una valor monetarya. Ma, puedriya ser unas de las erensyas mas valutozas en la vida de una persona.
Oy en dia, la teknolojiya mos ofrese innumerables formas de no olvidar nada. Las fotografias, los mesajes, los archivos, los kalendaryos… Ma, la forma en ke el korason umano se akodra es totalamente diferente.
Tornamos a muestra chikes kuando sintimos una golor. Kon una kantika vyeja, mos estamos akodrando de muestra manseves. Un findjan de kafe mos esta azyendo akodrar un sohbet ke izimos antes anyos, un nombre solo mos esta akodrando toda una vida.
Por bushkar no asperaremos un dia espesyal.
Para dizir “Komo estas” no bushkaremos una razon. Si ay mizmo munchos anyos ke no mos vemos kon un aliado lobushkaremos por telefono.
Otra koza tan ermoza komo ser akodrado es akodrarmos.
Un dia, una persona se da kuento de esto.
LAS TRASAS MAS ERMOZAS DE LA VIDA, NO SON EN LAS KOZAS KE DESHAMOS ATRAS, BIVEN EN LOS KORASONES DE LAS PERSONAS KE SE AKODRAN KON AMOR.
