Desde ke vinimos de la kampanya ke estamos en un maraton. Vino Roshashana, izimos dulse de mansana, kyoftikas de prasa, avas kon espinaka, detras vino Kipur; a la tomadura makaron ograten, a la kortadura pan i azete i supa de gayina i agora estamos en el dalkavo moed, Sukot. Mos vamos a ir a la Suka, vamos a komer bulemas, borekas i por siguro uvas; esta semana tenemos dias espesyal, por egzempyo, Oshana raba no se lava, Simhat tora no se aze echo ansi vide de mi madre.
No vos pareska ke me esto keshando; a la kontra los moedes me plazen porke auna las famiyas.
Solo una chika kritika kero azer. Mi entisyon no es dar lisyon, konsejos, blamar i edukar a dingunos. Tanto tyempo ke so jurnalista lo konsidero mi dover de eskrivir.
Kipur uzo irme a la keila Etz Ahayim de Ortaköy ke es serka de mi kaza. Una keila muy ermoza, limpya i konfortavle. El haham akaal, Nafi Haleva me aresive kon karinyo, lo konosko de chiko porke yo era eleva de lisyones de Tora de su padre, el defondo hahambashi Rav İzak Haleva, el hazan İzzet Barokas, kon su boz ermoza mos kito de hova.
Todo muy ermozo ma por mi puevlo no va dizir la mezma koza. Yo no so del todo relijyoza ma penso ke kale dar onor a los ke meldan, sovre todo diya de kipur, ambyertos lo mas en pyes orasyonando kon kavana komo diziya mi padre. La keila por dia de kipur para mi no estava muy yena, sovretodo noche de kipur djente kontadas. Antes unos kuantos anyos no puediamos entrar mezmo, esto mos aviza otruna vez ke mos apokimos bastante. Oras de tadre mankando medya ora al shofar empeso a inchirse la azara. Ken i ken gritara i yamara a su amiga ke le de lugar, un bruido de konversasyon emposivle de oyir la orasyon, ken dando tornos i lo mas ke me izo pena, syertas dammas lo mas de 35 a 50 anyos el mobil en la mano mandando u meldando mesajes. Ya lo se muy byen ke kon tyempo todo troka ma dezeo un poko de respekto en ora de orasyon. Mi puevlo kerido, seash lo ke seash, ke bivash munchos anyos kon sanedad, kon pas i para kada anyo mos ayege el Dyo.
HAG SUKOT SAMEAH.
